Nna Waṛdiya mm imezran
Aḥesṛa a zik-nni
Ass mi tt-yuɣ dda Sliman
Cbaḥa tekka di tziri
D aggur i wumi zzin yetran
Yessarem yal d ilemẓi
Ssarmen-tt ula d lexwan
Tamtilt-is d ayen ur nelli
***
Tadist amenzu n tasa
D listiqlal yekfa ukukru
Tluled (as)m(i) akken tefra
Deg useggas n swaṣundu
Semman-as Lḥuriya
Fell-as aḥuddu aḥunnu
Tečča akk taddart meṛṛa
D ttameɣṛa yugar seksu.
***
Dda Sliman izem n tizza
Sebɛa snin ur yerri aḍaṛ
D amezwaru gar imenza
I d-yekkren ɣer listiɛmaṛ
Di lwilaya talita
Mundu awwel nufambaṛ
Xas akken tefra lgirra
Netta yeqqim deg udrar.
***
Fṛansa ur s-tezmir ara
Dda Sliman d izem aɣilas
Isemmeḥ di Waṛdiya
Waṛdi lalla-s n tullas
Nɣant di swasunteṛwa
Di lgirra-nni n lafafas
Teggujel lḥuriya
Teggujel ur taṛwi baba-s.
***
Waṛdiya tegred limin
Teggul ur tt-yuγ yiwen
Teggul akken ara teqqim
Teggul ur tekkis leḥzen
Ur tusim si telmeẓyin
Ur tt-id yecqi deg argazen
Ur tesbiɣ ticenfirin
Ur terra taẓult i wallen.
***
Nna Waṛdi d tamɣaṛt tura
Ḥuriya d tilemẓit
Muslima mutaḥaǧiba
Tettẓalla ṣbeḥ tameddit
Tura mi tfuk leqṛaya
Teddiplumi di tcaṛɛit
Tewweḍ tmanya uɛacrin nesna
Ilaq ad teddu d tislit.
***
Ḥuriya tedda d tislit
S ssunna n Ṛebbi d nnbi
Yuɣ-itt uqcic ay acek-it
Tiɣṛatin a nna Waṛdi
Yelli-m tenkeṛ taqbaylit
Tenkeṛ tamaziɣt-nni
Ziɣ tettbeddil ddunit
Dda Sli deg uẓekka ad yetti
***
Argaz yuɣen Ḥuriya
Yetṛecceḥ yuɣal d lmir
Yeṭṭef amezzir i Lɛaṣima
Axxam-is ur d as-yezmir
Yettgalla ar am ass-a
Ad tt-id-yawi d lwazir
Mi d as-fɣent tirga mxalfa
Yuɣal kamim d lamir.
