Ungal aneggaru n Youcef Merahi, Je brûlerai la mer yerra-t-id Ḥamid Bilek ɣer tmaziɣ (teqbaylit) s wezwel Ad ḥarqeɣ lebḥer. Ungal-a zzun mačči d tasuqqilt, d yiwet n tira si tefransist ar teqbaylit, yal awal s umur-is, yal tanfalit s wazal-is.
Ungal-a yenna-d udem yefren n ugdud azzayri yelḥan d lqarn ɣef tlelli-s, d udem n Lezzayer n 62 ar imira, ayen d-yules ur yella ara deg yidlisen n umezruy. Acu amezruy-nneɣ ddeqs i deg-s n tkerkas, ddeqs n tidet yeffer umur-is.
Ungalen d abrid niḍen d-isekfalen ayen fren yimazrayen neɣ ur as-uɣalen ara s lmendad. Amekar yesteqsa: “Lemmer ad yuɣal umnekcam, ad as-neḥku acu texdem timmunent” (Sb.37) “Azzayri akked d tlelli, d tayuga ur nezmir ad msefhament” (Sb. 47). D ixef n wawal kan ɣef ugdud yeṭṭafaren am ulli d wat iččumar izellun tilawin d yigerdan s yisem n Ṛebbi.
Deg ungal –a yemmeslay-d ɣef temdint n Belcourt i zedɣen yirumyen send ad ffɣen, tezdeɣ-itt tezdeg d ccbeḥa, asmi i-d-tegra ar warraw-is, ibeddel wudem-is, gezren-t, wecmen-t. Belcourt tedrem, sdarɣlen-as tafat, teffeɣ-itt tezdeg, ḍlan-as ilefḍan; ggran amticki d nutni d imnekcam. Fiḥel awal amek kecmen yemdanen tinezduɣin, awal yuɣal i Meraḥi.
Γef Σmar Bumbara mmi-s n Belcourt, yedder akken yufa, yefka azuɣar i wayen yuran. Yemmeslay-d daɣen ɣef Wakli aqbayli iḥemmlen Deḥman Lḥarraci maɛna ireffu mi ara isell i tezlit-ni : “Ya ṛayaḥ …” Imi yeẓra ma iruḥ ur yelli d acu ara yeǧǧ deffir-s ala ayen ɣef i yerwel. Neɣ Miẓmiẓ d Bouεlam yextaren lehyuf d udebbuz akken ad idiren. Rebεa-nni (4) yimeddukal yextaren tiqraɛtin d yimesḍan n tlawin akken ad sgunfun si tilawt ur yettlawi yiwen.
Amaru yesraɣ lebḥar akken ur saɛɛunt ara wallen tilisa ad yebrireḥ wallaɣ. Ad iẓẓer Uzzayri acu i wumi qqaren medden tamurt mačči d ṭizgi-a deg-i nettidir ass-a.
Imeɣri d tmeɣrit ad affen tidett d tilawt yefren gar imeslayen ɣef i mazal ur nufi abrid-is, anda tudert akkin wallen d war asirem tif tin n uɣebbar yesdderɣilen.
D ungal anda ameskar d umsuqqel-ines, nnan-d s yiwen yiles amek lebḥer icerg-it Uzzayri am tewriqt deg yura wayen ur nelhi. Acu kan akkin i lebḥer d asefru… niḍen.
