Ula ara d-yini ubeckiḍ n ddel zdat n yimru agrawliw alsan… skud neṭṭef deg leεnaya n tesekla, ad tennecṛaḥ tmedyezt iγef nsenned teddem-aγ neddem-itt.
D amhaz neγ d azγan aseklan kan ara γ-yefken afriwen akken ad neḥṣu s yiẓuran n usekkil, n umeslay, n tutlayt. Iwumi nessawal nettmeslay ma dγa iles-nneγ yeggugem, yesgugum? Ah lemmer nerra tidet d asefru, d asefru-nni-nneγ swaydeg ara taf cwiṭ iman-is tesqilt-a-nneγ i γ-d-iṣaḥen d amaḍal!
Ulac tilisa deg uxemmem; d tiktiwin i d tussniwin. Ur d aγ-yeffiγ ur itteffaγ wawal aseklan deg-neγ acku si zik γur-neγ asteqsi d gma-s n uciweṛ. Ur yelli ṣṣwab d agujil: Yiwen ur yeksib ayen yenwa yenna-t mi t-nnan widen-nniḍen akken nniḍen. D ayen ara yessemyigren awal d umeslay akken ad nemyussan, ad nekcem deg yillel-a n ″Ugarmeslay: Dialogisme″ i γzan deg-s yimussnawen imeqqranen, ladγa Mikhaïl Bakhtine.
Ar d-nettuγal di yal taswiεt yettṛuẓun aqerruy γef waya mi t-neqqar: S usteqsi akked uciweṛ ara d-neslal isteqsiyen yettawin γer yiberdan yettemcawaṛen, γer teftilin n tifrat. Ur telli tidet yemmden deg wayen nettwali neγ ula deg tussniwin s umata. Deg tegnawt-a i yenna Blaise Pascal: ″Anemgal n tidet mačči d tuccḍa, ur yezmir ara ad yili kan akka d tuccḍa; yezmer ad yili d tidet nniḍen, d tidet tanemgalt.″
Seg wawal γer umawal, seg umeslay ar tmeslayt; ma nessaγzef cwiṭ axemmem s tewzel: D acu-ten waman n tagut, d amek ara nili deffir tudert n tmettant, d acu-ten tidet ṣṣwab d tilawt, amezruy aneγlan targit…ahat d tasekla.
