Izem yeǧǧa tiẓgi kra n tallit akken, yehmel deg yizuɣar. Deg teẓgi, yekker herwel, ur yeqqim uzref wala tisirit. Tikli n yiɣersiwen tbeddel. At yimɣan, mi ččan, rwan, ad sxesren ayen yeggran; at uksum, qqlen neqqen s zzur, nnig tawant.
Kra n yiɣersiwen, ifaqen s teẓgi tehmel, tetteddu ɣer nnger, bɣan ad d-sersen talwit. Xemmen, ufan-d ilaq-asen ugellid ara yerren tilisa, ad tuɣal tudert ay nnumen. Kra n uɣersiw yeṭṭfen adabu, yuɣal yeɣli segmi ulac win ara s-yaɣen awal, ad iqader izerfan iqdimen.
Mazal Ibki. Rran ɣer-s, yeqbel. Yenna-asen: « Tamsalt n tgelda, zemreɣ-as. D acu kan s ccerṭ! Merra imezdaɣ n teẓgi ad d-zrirgen sdat-i, ad iyi-ceḍḥen; d ta i d limara qeblen-iyi ad iliɣ d agellid fell-asen. »
Ass-nni n tmeɣra n tgelda, Ibki icebbeḥ, yeqqim ɣef tarikt, lxuǧa ɣer tama-s. Gar-as d yiɣersiwen nniḍen tella tqaεet. Yal tawsit deg-sen ad tefk yiwen ara iceḍḥen i yebki. Axut yezzetwan, ad yendeh yibki : » Aru-t a lxuǧa yecḍeḥ! Azekka, ulac tuzzmiwin. » Zrint merra, anagar tin n yizmawen.
Mi tekfa tmeɣra, srebḥen-as tiwḍin s adabu, yesseggra-asen: » Ala! Ur nekmaleɣ ara skud mazal izem ur i-yecḍiḥ ara. »
Taseqqamut-nni n yiεerḍiyen, truḥ ɣer yizem, tufa-t sakken yekcem seg yinig. Ulsen-as taluft, ḥettmen-t ad yeddu d uḍar-nsen akken ad awḍen send ad tefru tmeɣra. Yenna-asen: » Mi d netta i yi-d-icerḍen, ur ttayset-ara, ad yerǧu, » Wid-nni, uɣalen, izem yuker taqejjirt, yeggra ɣer deffir.
Agdud yettraju, izem iεeṭṭel. Uysen-t.
Armi deqqs, ha-t yizem iserru ɣer unnar n tmeɣra.
Mi yewweḍ, qublen-t s tuzzma: » Waqila ur tebɣiḍ ara aya i nga? »
Yerra-asen: » Ala, cerheɣ nezzeh. D tamsalt-agi kan n ccḍeḥ i ufiɣ d ugur, dɣa qqimeɣ ttnadiɣ g lekwaɣeḍ n lejdud-iw ma tezwar-asen ceḍhen i yibki, ur d-ufiɣ ara! »
Nnan-as : » Ihi amek? » Yerra-asen : » Ur tt-id-snulfuyeɣ, ur tt-id-jerruɣ ! »
Yekker uɣilas, yenna-asen : » Dayen ay agraw, tefra, d izem i d agellid n teẓgi, fiḥel tameɣra, fiḥel iqeddacen! ».
Seg wass-nni, uɣalent tlisa anda rsent, tuɣal lehna ɣer teẓgi.
Yahia Belil
