Ddiɣ deg ubrid n usmekti… yeṭṭef-iyi ufus ḥninen, d afus i sebɣent lmalaykat… d afus yuran awalen i d-yenna Nnbi… Ziɣ llant tujjmiwin ula di tɣuri.
Ṭṭfent-iyi tujjwinin ussan yezrin ɣef wayen i ɣriɣ yakan zik-nni, asmi tterḍiqen yidmaren, asmi lliɣ d acawrar, iseggasen-nni n tesnawit. Imir-nni, nettḍilli cwiṭ cwiṭ ɣef lbenna n tsekla am yinubiyen yesṭuṭṭucen ɣef temlel n tedmarin. Imir-nni, nekker i tɣuri kan akka, yerna ur as-nessin i tnekkra, neḍfer kan anya n yisekkilen mi ara t-terfed taɣect n tɣuri.
Cfiɣ ɣef wussan-nni, ad d-tiniḍ ɣef ugerruj i nḍall ; nettemyezwir ɣer yidlisen ; nettemweṣṣi ɣef yidlisen ; nettemyerḍal idlisen ; nettmeslay ɣef yidlisen. Ccfawat n wussan-nni, mazal-iten gar wallen-iw : nekk d yimdukkal (yal wa tamurt i as-igan irebbi ; nekk, teṭṭef-iyi Tizi). Neqqar kan idlisen, nettmeslay fell-asen… nenwa ad nbeddel i zzman tikli… Tura, mi zrin yiseggasen, neẓra akkit (ih akk°it) : zzman ur ibeddel ara, ma d lbenna n teswiɛt-nni tedhen ussan-nneɣ ussan-nni. Nekk, ad d-iniɣ : cwiṭ n lbenna n wussan-nni temla-aɣ igli n wass-a.
Ass-a, bɣiɣ kan ad d-smektiɣ, mazal-itt lbenna-nni. Tura mi asen-ulseɣ taɣuri i sin n yidlisen n Ǧibran Xalil Ǧibran, yerna s teɛrabt (akken i ten-ɣriɣ tikkelt tamenzut), ussan-nni mi tterḍiqen yidmaren. Adlis amenzu d « Ennabi » (Nnbi). Wis sin d Ḥadiqatu ennabi (Tabḥirt n nnbi).
Taɣuri n wass-a, ur teɛdil d tin n wussan-nni. Γas akken, lbenna tezga tella. Sin n yidlisen-a, deg-sen udem ameqqran n tedmi tafelsafit n Ǧibran Xalil Ǧibran. Deg-sen diɣen tineggas n tudert-is, ama d tid yeqqnen ɣer lɣerba-s d yiḥulfan-is, ama d tid yerzan tamuɣli-s ɣef ddunit d tilin n umdan d talsa, ama d tid yeɛnan tamuɣli-s ɣef usnulfu d tira taseklant.
Sin n yidlisen-a, nezmer ad asen-nernu wis tlata (Mawt ennabi = Tamettant n nnbi), d idlisen i d-yettawin ɣef wassaɣen n umdan d wayen i as-d-yezzin. « Ennabi », yettawi-d ɣef wassaɣen n umdan d wiyeḍ (gar Nnbi, El-musṭafa, d yimdanen i t-yesteqsayen ɣef temsal n ddunit). Ḥadiqatu ennabi, yettawi-d ɣef wassaɣen n umdan d ugama ; deg udlis-a, yerra Ǧibran tibḥirt d tugna n tengisemt (synecdoque) n ugama. Deg udlis wis tlata, « Mawt ennabi » (urɛad i as-ulseɣ taɣuri), yettawi-d ɣef wassaɣen gar umdan d Ṛebbi (ma cfiɣ akken iwulem : amdan d Ṛebbi, tudert d tmettant deg yiwen n wannar, ma d arwat ur as-cfiɣ ara).
Idlisen-a akk, gan zzedwa i usedyez n wawal. Deg-sen, tasrit tleqqem-itt tmedyazt, akken temsel tedmi tafelsafit s yiḥulfan n umdan i yezdeɣ usteqsi.
D idlisen yelhan. Ma ur yerbiḥ umeɣri fell-asen, ur ixesser ara. Ḍemneɣ-t : ur yettxellis ara tabzert.
Akken llant tlisa i surufen yiḍarren… akken i medlen tewwura i llan tsura… Ccbaḥa, ur umineɣ tesɛa ṣṣef…
Muḥend Akli Salḥi
