Tazeqqa teččur, flen yimdanen ɣef yidisan-is, bedden, zzin-d am uzrar ɣef wid yeqqimen. Qublen merra asayes, ttwalin agdil iɣef ttemseḍfarent tewlafin n tduliwin n yidlisen n yimura i wumi d-ssuffɣent teẓrigin Imtidad idlisen s tmaziɣt… simi ara yebdu wahil n temlilit i d-heggan yimsuddsen.
Deg tzeqqa n yisaragen n Uxxam n yidles «Lmulud at Mɛemmer» n Tizi Wezzu i nnejmaɛen yinebgawen n lḥerma i d-yusan ad ḥeḍren i temlilit i d-heggant teẓrigin Imtidad iwakken ad rrent tajmilt i yimura i wumi d-ssuffɣent idlisen s tmaziɣt deg wayen yerzan annar-a n tsekla s umata.
I tikkelt tamezwarut ara tuɣal tejmilt s warrazen i yimura s tmaziɣt deg yiwet n temlilit i ten-yesdukklen deg tzeqqa irefden isem n win igan llsas i tutlayt n yemma-s, deg yiwen n wass s wazal-is agraɣlan. I tikkelt tamezwarut i yekker umsiẓreg, s lebɣi-s, i tmeɣra yecban ta ilmend n usfugel s wass agraɣlan n tutlayin n tyemmat.
D ungalen, d tisuqqilin, d ticemliyin, d tamedyezt, d tizrawin, d amezgun, d timucuha neɣ d tanaga, ugar n ɛecrin n yimura akked tlatin seg yidlisen-nsen iss yesfugel yimḍebber n teẓrigin Imtidad, Firas Eldjahmani, ass agraɣlan n tutlayin n tyemmat n useggas-a 2023 s tallelt n Tmehla n yidles d tẓuri n lwilaya n Tizi Wezzu akked Tmesrit n udlis amaziɣ n at Wasif.
Deg temlilit-a daɣen i tuɣal lwelha ɣer tejmilt akked usmekti -ulamma imsuddsen ur ttun ara- yerzan sin n yimeɣnasen inuḍḥen ɣef tutlayt n tyemmat, uran yis-s, xedmen yis-s, urgan yis-s, ǧǧan-d afaris d yisenfaren s wazal-nsen, wi d asenselkam Samir Arkam at Umalek akked umaswaḍ, aselway n tiddukkla n yiselmaden n tmaziɣt n lwilaya n Tizi Wezzu, Mhanna Boudinar i aɣ-yeǧǧan, ruḥen ǧǧan-d daɣen ilem yeččuren s umahil-nsen, s tektiwin-nsen akked tmuɣliwin-nsen ɣer wayen akk yerzan asnerni n tutlayt tamaziɣt.
Adlis n Mhanna ɣef unaẓur Atmani, yeffeɣ-d ɣur Imtidad, yejmeɛ-d isefra-s, yerna tizrawin i kra seg-sen. D mmi-s i yellan dinna i yessawḍen ayen i d-ihegga baba-s i umsiẓreg imi Mhanna yeǧǧa-yaɣ qbel ad d-yeffeɣ udlis-is. Sgunfu deg talwit timezgit ay ameddakkel.
Ma d Samir Arkam at Umalek, d imeddukkal-is i d-iheggan adlis fell-as, d tajmilt, d tanaga i d-yeffeɣ daɣen ɣur Imtidad. Tawacult n Samir teḥḍer i temlilit, tefreḥ s wayen i xedmen yimeddukkal i mmi-tsen. Sgunfu deg talwit timezgit ay ameddakkel.
Nnig tejmilt-a akked warrazen i yettunefken i yimura, yella uzamul am wakken llan wazalen ; akken yebɣu yili umdan, anda yebɣu yili, ilaq ad iqader tutlayt n yemma-s akked tutlayin n tyemmatin n ddunit merra axaṭer kif-kif-itent, msawant, ma tella tin i yufraren ɣef tiyaḍ, tajmilt i warraw-is i tt-ibabben, i tt-yemmeslayen, i tt-yeslemden, i iqedcen yis-s, i tt-yerran d aḥric seg tudert-nsen, ɣas mmuten ad d-ǧǧen ixulaf ara tt-irefden.
Ḥemmleɣ-kem a tutlayt-iw !, akka i ilaq ad yili uzwel n uḍris-a. D azwel yesdukklen imdanen yeckenṭḍen deg wayen i d-iḍefren ayen d-ṭṭḍen seg yidmaren n tyemmatin-nsen. D azwel yekksen tilisa akked yifergan i wawal. D azwel yessawḍen Firas Eldjahmani -ur nelli d Aqbayli- ad yerr azal i tutlayt ur nelli d tin n yemma-s imi yegza azalen yeṭṭafaren kra n win yettḥaraben ɣef tutlayt n tyemmat. D azwel n udlis amezwaru s tmaziɣt i d-yessuffeɣ deg teẓrigin Atfalouna yellan yakan qbel ad d-lalent Imtidad.
Ramdane Abdenbi
