Hmimi akked Belqa rran s axxamn n Sadiya n L’euro. Afen-tt-in teččwiq : “ay alxir-inu fuken imeṭṭawen…a ttejra n lḥlu tefka-d afriwen…” Ur ttluɛan ara. Kkren ula d nutni ččiwiqen yid-s. Amecwar akka, tmuqel-iten-d, tenna-sen :
– Ṛṛay-agi ur d iyi-ɛjib ara .
– D acu-t a nna Sadiya , s-d-rran ɣef tikkelt?
– Izem d-rebba tsedda, win i d awen-yemlan tamurt n umaziɣ, amek akka ara yemḍel deg Lpari ?
Dɣa sfehmen-as belli d taswiɛt i iḥersen, mi ters, ad d-yuɣal Yidir s akal t-id-yesekkren. Tuɣal ters Sadiya n L’euro, terfed ifassen-is s igenni, tenna : “ttxil-k a Sidi Rebbi, sewseɛ-itt fell-as ldi-yas-d tiwwura-k !”. Tbedd. Fɣen seg wexxam rran ɣer tmacint ad inigen ad d-zren Ɛebban Remḍan akken mmsefhamen, mi d-uɣalen si 62.
Amecwar akka, afen-d iman-nnsen di 52, tama n Ɛebban Remḍan, di lḥebs n Ensisheim (Alsace) di Fransa.
Susmen awal ur ten-id-yuli ara , azal n nnefṣ n saɛa. Ɛebban yeẓẓel ɣef tfersadit ulac deg-s. Tuɣ-it yettaru ɣef tewriqin meẓẓiyit maḍi. Yettbin yeɛya, yuḍen acemma. Ass-nni d wis rebɛa seg wasmi i yebda grève de la faim.
Ha-t-n yenṭeq Lbacir s taɣect yergagan : « a..z…u…l mass Ɛebban ! ». Yerfed aqerru-s Wedrar-nni i ifeṣlen le FLN yecmumeḥ, yenna : «Ihuh, anect-agi akk i ɛyiɣ !»
– Ala a dda Ɛebban, ur teɛyid ara, s-d-yerra Belqa
– Anwa keč ? Anida-k ?
– Nek d Belqa aql-yi d nna Sadiya akked Hmimi. Nuna-g-si Lezzayer 2020. Neǧǧa-tt-n terwi a mass Ɛebban.
– D acu-t “azul mass”?
– “bonjour monsieur’’ s tmaziɣt.
– Tamaziɣt ! Mais c’est très bien ! Acimi d-tenniḍ teǧiḍ-tt-n terwi ?
– C’est une longue histoire. Ruḥeɣ-d t’avertir mass Ɛebban ɣef ayen i k-yettrajun.
Dɣa yekkfa-d ul-is. Yemmesla-yas-d ɣef Boussouf, Boumédienne, Bouteflika, Krim…. Yemmeslaya-d daɣen ɣef txazabit t-yeggunin di Maoc deg useggas 1957.
NSadiya n L’euro tetthuzu aaqerru-s, teqqar i yiman-is : « a tafat n tifrat mmel-as abri dar zdat ! »
Yecmumeḥ Ɛebban, yessers astil akked tewriqin di lqaɛa, yeẓẓel ɣef tferṣadit, yeqqen allen-is.
Lbacir akked Belqa susmen. NSadiya n L’euro mazal-tt testetum dawat n lxir. Rna kra n tsaɛṭin di lqefs ad rwun udem n Ɛebban.
Iminigen memmyuqalen. Inṭeq-d Belqa : “lḥasun ulac i ifun, simmal nettuɣal ar deffir deg umezruy, simmal nessextay taɣyulit Kkert ad nuɣal ar taddart. Sakin ad nruḥ ad nẓur Dey Hussein Ibn Hussein, win yezzenzen tamurt s umursut n baqlawa”
