Lehwa d iḥemmalen di Tiɣil n Seksu. Lkumiti yennejmaɛ di lakul. Taddart meṛṛa temlal din. Yella ula d Tayemmum. Dɣa d netta i d-neṭqen d amezwaru : « lahu ma Sali ɛalyek ya rasul lah. Ay atmaten ilaq ad tezṛem belli aya sɣur Rebbi i d-yekka. Aseggas iɛaeddan d timest, aseggas-a d iḥemmalen. Ihi ma nebɣa ad aɣ-yejbeṛ Rebbi, ilaq ad nbeddel tikli, ilaq… »
Ilmeẓyen yellan din ur t-ǧǧin ara ad d-ifak awal : « qerret ! susem, tuɣmest… ! »
Terfed afus-is Sadiya n l’Euro s kra yellan deg unejmuɛ yessusem. « Ayen akka d-yenna Lḥaǧ d ṣwab : ilaq ad nbeddel tikli », d-tenna. Tddart tewhem deg imeslayen n Sadiya n l’Euro. Werǧin tessexleḍ talwit di trewiḥt. win i wehmen ugar d Tayemmum. Yettmuqul-tt, yecmumuḥ, yeqqar i yiman-is : « waqila tikkelt-a d nek ara iḍebren bi idni lah »
– Acu akke i kem-yuɣen a nna Sadiya ?
– Acimi a lbacir, acu d-nniɣ ?
-Twefqeḍ Tay… lḥaǧ.
– Ih deg wayen akk i d-yenna yella cwiṭ n swab : ad nbeddel tikli. Neɣ tebɣam ad neqqim akka, alamma yewwi-yaɣ uḥemmal ?
Tkemmel deg wawal-is tenna akk amek i wala tamsalt. Tluɛa kra n yimeẓyen. Yal tarbaɛt tefka-yas cɣul. Ayen yezwaren d aḥareb ɣef terwiḥin. Yiwet n terbaɛt telha-d d yixxamen n kra n twaculin i yezmer ad yawi uḥmmal, ma yela tkemmel lehwa s ljed-nni. « ilaq ad d-awim tiwaculin ɣer lakul, anda ara yilint di laman ». Tarbaɛt tayeḍ i ṣaḥ-itt-id uheyyi n lakauls yemṭerḥen akked wučči. Ma tarbaɛt tis tlata ad d-telhu s twaksa n wayen akk ara yeṭṭfen aman n lehwa.
Iḥus Tayemmum am akken yenser-as cwiṭ n pouvoir. Ixemmem d yima-is, yenna s nnig wul-is « ula d nek d wagi i d ṛṛay-iw. Ayen twalam zemreɣ ad t-xedmeɣ, init-t-d ! »
Yerra-yas-d Lbacir : « Ad aɣyenfeɛ Rebbi s lbaraka-k a dda lḥaǧ ! Ahat ad tnefɛeḍ taddart, lukan ad textirreḍ tarbaɛt n yimeẓẓula, ad teẓalem ṣalat listiskaw ! »
Yettkemmil
Tahar Ould Amar
