Ur yebɛid ara wesmekti n tmettant n Matoub. Lbacir akked Belqa fran-tt di ṛṛay: ad rekben tamacint n zman, ad ruḥen ad d-ẓren Lwennas.
Ur teddi ara Sadita n l’Euro, ugaden i iḍerrun d wul-is. Dɣa mmsenyafen ad ruḥen s tufra, ur d as-qqaren ara. Rnu telha-d s taluft n yiḥemmalen.
Tizi ouzou,anebdu n 1998. D ssebɛa n sbeḥ. Lqahwa n yiḍebbalen teččur d imesdurar n twaɣit. Kra deg-sen ttrajun ad ldint tbernat, ahat ad as-d-afen ixef-is. Kra nniḍen ɣer ssuq n cemma n nɣid i d-ruḥen…tessen lqahwa di laɛḍil ad teldi la bourse n cemma. Wiyaḍ, ulac s anda rren, ajajiḥ n wass-nni, rnu lqahwa n yiḍebballen mur teswiḍ ara ad tesleḍ, et comme d timeẓẓuɣin n temɣarin i sɛan, ur ttafen ara axir n lqahwa n yiḍebbalen. Abrid n ukerrus n tlemmast n temdint ur ɛad yeččur d tikerwas. At zedi Muḥ mazal-iten xucen. D imesdurar kan tt-iɛemren tasebḥit-nni. Ɣas akken kan i yuli wass, aɣemac ibedd ɣe tfednin.
Tizi n 1998 tettban-d zeddiget ɣef tin n wass-a. “ Waqila d tidet: notre avenir est dans le passé! » d-yenna Belqa. Lbacir yettmuqul-t kan, ur yefhim ara acu yebɣa ad as-d-yini. Tasaɛet tewweḍ 11. “d lawan ad ner ɣer Concorde”, Yenna Lbacir . Seg wasmi bdan ttinigen di tmacint n zman, almi d ass-nni i kukran inig.
Wwḍen ɣer Concorde. Nudan ɣef restaurant, ufan-t. Slan i wesqehqeh, mmuqlen iban-asen-d Lwennas zin-as kra n yilmeẓyen. Amecwar akka, ibedd Lwennas si ṭabla : “sureft-iyi , ad ruḥeɣ ɣer les sanitaires”. Lbacir d Belqa fursen tagnit, rran ula d nutni ɣer les sanitaires.
Lwennas yessirid igfassen-is. Yenteq Lbacir :
-Azul a Lwennas!
-Azul agma,d as-d-yerra mmebla ma imuqel win t-d-iluɛan.
Mi yezzi ad iwali win t-id-iluɛan, ur t-yufi ara, yecmumeḥ, yenna : “ihuh, waqila bɣiɣ ad tt-i-d-ẓgeɣ ur turiw ! ». Lbacir akked umeddakul-is fijin. Awal ur ten-.d-yuli ara. Ččan Lwennas s tmuɣli. Imeṭṭawen uzlen-d ɣef leḥnak-nnsen ur rin tamawt. Kkren ad medlen tawwurt n les sanitaires akken ur d-iteffeɣ ara Lwennas. Yewa-yasen kan, rnu ẓran ulac izemren ad t-xedmen, ḥala meslay. Suɣen : “di laɛnaya-k a Lwennas ur teffeɣ ara si concorde, ens da!” Yebruḥ-asent Lwennas i wallen-is, imuqel akka d wakka, yenna : “ihuh, d acu-t uxessar-agi!”, uqbel ad yuɣal ɣer ṭabla ad ikemmel leftur-is netta akked widen yellan yid-s. Ččan, swan, mmeslayen, ḍsan…uɣalen kkren. Uqbel ad yeffex seg Concorde, qusmen-as kra n yimeẓyen ad d-wesfen yid-s. Yuɣ-asen di lebɣi, mi ifuk awesef yid-sen, yeffeɣ-d, yerra ar tkerrust-is. Yerkeb, yesekker amutur…adrar ay uccen!
Lbacir d Belqa neṭṭḍen di Lwennas am tili-is. Mi qrib ad awḍen ɣer Tberquqin anda akken d- yewwet webruri, Hmimi akked Belqa ḥebsen. Ur zmiren ara ad walin ayen ara.
Amecwaṛ akka slan i rsas yessenhez tamurt. Iminigen n 2020 rran iqerra-nnsen gar ifassen-nnsen, wwin-tt akken d tiɣiɣit ɣer tmacint n zman.
“Ass-agi lliɣ, azekka wissen
Nniɣ-d ayen zriɣ d wayen ttwliɣ
Cfut di tirga ma ɣliɣ
D anza-w ara wen-d-yessiwlen”
Tahar Ould Amar
