D tiɣri i useɣres n rrbug, n yal rrebg, d tiɣri i ufraḍ n takka d uɣebbar yulin allaɣen d wulawen.
D ancad ɣer tmeɣra n terwiḥt i ittekksen asbak i yeggaren amdan deg ubrid ur nessuffuɣ.
D asmekti n teswiɛin i tedhen tizeḍt d lhu, d tinubga ɣer tedfi mebla asetḥi neɣ akukru.
D abrid i yettawin ɣer lbaḍnat n lbenna d ufriwes n teṛwiḥt mi ara mlilent tmuɣliwin n wulawen.
D rreḥba n yiḥulfan mi ara ttemsewwaqen ɣef truẓi n leqyud yurzen lebɣi n umdan.
D tanekra n wul i iffuden tilelli mi ara yezher umennuɣ n tedfi sdat leqwanen n tmetti isebken.
D amenni n tlelli, s tezmilin n uẓawan i yerran tiselbi n warrac d tinelli itteqnen ɣer tudert.
D timenna n yiles isarmen taruẓi n wuglan, d aferfer n wawal n tayri deg yigenni azegzaw.
D taruɣi n walim deg tmest yettfeǧǧiǧen i d-yettakken tafat i yitbiren, akken ad frefren wa nnig wayeḍ.
D amzur i ubeḥri i d-iṣuḍen, d lmuja ɣef yijdi yerɣan, d aḥulfu deg wul i imennan neɣ d tarzeft i wass-nni n umulli. D imɣi yettnernin, d ass amenzu, d asefru n tayri, d aẓawan ḥlawen.
D arqiqes n yiḍuḍan ɣef yinzizen n tgiṭart, d anya-nni n Bithuben, d tamuɣli-nni i yettwalin ɣer daxel, d targit-nni n wagu ɣef tedmarin n tɣaltin…
Tuɣac n Farid Ɛebbac d tizerqeqt n tiṭ n tmedyazt yuran ɣef lkaɣeḍ n lebɣi.
Ma ur iyi-tuminem ara, ḥesset-as i tuɣac-is. Ma ur neɛdil, ur ttemxalaf. Walit asefru mi yerfed ifassen.
Muḥend Akli Salḥi
