Deg wexxam n Sadiya n l’Euro, gezmen-tt di ṛṛay : ad tili temceret… n udlis. D Rezki Dezdeg i d asen-yennan ad kksen awal « ṛṛeḥba ». Wufqen-t meṛṛa di ṛṛay, mi d asen-yessefhem acimi : « Tamazwarut, ur nesutur ara ttesriḥ si ddula.
Yettusemma ulac les conditions météorologiques akked les raisons technico-administratives ar aɣ-iḥebsen. Tin ɣur-s, si sya d afella, ad as-nefk udem nniḍen i temceret. Yesufeɣ-aɣ leɛqel uɛebbuḍ yesmareyen di lkabini, ad d-nelhu d wallaɣ yessemɣren di can-nneɣ. Ulac izgaren, ulac, ikerciwen, ulac tiqinsya, ulac tixxamin, terminé ! »
Ur ifuk ara awal-is, isuɣ-d Dda Militant : « ulac, ulac, ulac smaḥ, ulac ! ». Akka i d Dda Miltant, am weqjun-nni n Pavlov, akken ara isel i wawal n tsertit ad d-isuɣ yiwen slogan. Ddunit-is meṛṛa d miltant. Yezzi-d meṛrâ i ikabaren n tsertit akked tdukkliwin n tmurt n leqbayel, yeggra-d di FFCD(Front de Force pour la Culture et la Démocratie). Ussan-nni n tnekkra,yexmet, ulac déclaration, ulac awal. Yeqqar i win t-yesteqsan acimi ur yikki ara di ḥirak : « Ɣaru ḥirak-agi ur yessufuɣ ara ɣer wayen yelhan »
Lbacir akked Belqa lhan-d s tinnubga n wid ara yettekkin di temceret n udlis. Dɣa, Lbacir yenna-sen :
– Acu tennam lukan ad d-nawṛeḍ Maẓ ?
-Anwa-t Maẓ-agi, i yesteqsa Dda Miltant ?
Yessefhem-as Belqa anwa-t Maẓ. Mi ifuk, yerra-as-d : « planète Ra ? Aha berka ur ttmesxir ara fell-i . Ahya Lbacir tɣliḍ-iyi…».
Ur ifuk ara awal-is, almi d-ibedd Maẓ di tlemmast usalun :
-Azul fell-wen !
-Ɛeslama-k Maẓ, acḥal aya ur nemzir, s-yerra Belqa
Rezqi Dezdeg akked Dda Militant ggugmen.
