…Mi d-yuɣal si colisée n Tiɣilt Useksut, dda Militant yeqqim acḥal ur t-id-yuli ara wawal. Ayen walant wallen-is yesgugem-it. « Ziɣen ad yessufeɣ laɛtab », i yeqqar i yiman-is.
– Acu akka a dda Militant, aqla-k teggugmeḍ, d as-yenna Lbacir
– Ad teggugmeḍ kan. Ɛni drus wayen n wala deg yinig aneggaru. Ditet kan a Lbacir, ferḥeɣ mačči d kra. Laɛtab-nneɣ, ladɛa n yimezwura yefkan tirwiḥin-nnsen ɣef tmurt, ad yeffeɣ ɣer tafat. Tura ɣas ma muteɣ azekka wicqa.
– Cafuɛa-k a dda Militant. Ur bɣiɣ ara ad ak-sxerbeɣ tirga, maɛna ilaq ad teḥsuḍ belli ayen d-neẓra yezmer ad yili, yezmer ur d-yettili ara.
-Amek akka ?
Yessefhem-as-d Lbacir amek tettinig tmacint n zman. Yenna-as belli, tikwal, tamacint teteddu lebɣi i tirga n wat taddart. Dɣa, tettinig yes-sen ɣer Lezzayer tamsadaɣt. Yettusemma dans un monde parallèle i izemren ur d-yettili ara s tidet.
– Ihuh, d acu-t daɣen uxessar-a , ula d tamacint teskeɛṛirt fell-aɣ ?
– Ala a dda Militant mačči d askeɛrer. Tagi d tussna. Qqaren-as l’intelligence artificielle. Tikwal, tkeccem tmacint s allaɣen-nneɣ akked iḥulfan-nneɣ. Mi ten-mimurizi, tetteddu-aɣ di lebɣi tessawaḍ-aɣ s anda ssawdent tirga-nneɣ. Amzun, tebɣa ad aɣ-d-tini : yella usirem, wali(m)t s anda i tzemrem ad tawḍem.
– Savidir le combat continue !
– D win a dda Militant.
Tameddit-nni yeqqim-as dda Militant i twerqet tacebḥant. Yessawal deg-s i wat Taddart ad ilin s lqewwa deg Ifri, i yiḍelli, akken ad as-d-ɛawden talalit i Ugraw n Sumam. Ifuk tabrat-is s ubruy n usefru n B.Aziz :
« … Lezzayer, tayri-w,
Tayri-nneɣ,
Acḥal d taɣerma, acḥal d idles
Cergen lebḥuṛ,
Ddan deg wakel-nneɣ yeṭṭurfens
Akked iberdan n tniri ur d-nettban, (ifiniqen, imaṣriyen, iɣriqiyen, irumaniyen, iqartajiyen, ibizantiyen, iwundalen, aɛraben…)
Lezzayer tamazight… »