Isem-is Sara. Tesɛa anagar tmenṭac n yiseggasen. D tarast. Tmelleḥ. Imawlan-is izad fell-asen cci. Ur tt-ixuṣṣ wara. Tewweḍ ɣer uswir aneggaru deg tesnawit. Werǧin tessen tayri n uqcic. Acḥal itebɛen deffir-s tugi-ten. Sutren-tt akk yilemẓiyen: wid yesɛan d wid ur nesɛi, wid icebḥen d wid ur necbiḥ, iɣezzfanen d yiwezlanen… Yiwen wass yessuter-tt ula d aselmad-is n waddal! Netta yettili anagar deffir-s mi ara tili deg tzeqqa tettazzal, tettanez…
Tugi-ten akk.
Tleḥḥu anagar nettat d Muna. Zedɣent ta sdat n ta. Muna daɣen ur txuṣṣ ara. Nettat kan d tamellalt, ma d ccbaḥa, sster… tesɛa-ten akken i llan ɣer temdakelt-is. Zadent-d deg-s wallen-is tizegzawin: win ara tt-imuqlen ad yeɣreq deg-sent. Nettat daɣen suturent akk wid tt-iwalan ; am Sara, sul kan ur tt-yessuter ara uselmad n waddal.
Ddukulent akken. Deg leqraya wwint-d iman-nsent : ur ddaw ubrid, ur nnig-s, deg ubrid kan i yessawaḍen s anda i ttawḍen akk yinelmaden.
Inelmaden yeqqaren deg tesnawit anda qqarent, dima ssiriden allen-nsen yes-sent, deg tirma n usteɛfu. Ur zmiren ara ad asent-mmeslayen, ulamek ara yemmeslay uqcic akked teqcict anda qqaren. Iɛessasen n tesnawit zgan d iɛessasen ɣef waya: ad d-ẓren kan sin mgaraden deg tuzzuft ad ẓedmen, ad suɣen fell-asen, zun teddun ad sṭerḍqen lbumba. Ḥemmlen tinelmadin-nni i nutni kan. Nutni, zgan sṭuṭṭucen mi ara d-walin kra n tnelmadet. Nutni ɣas ad mmeslayen yid-sent.
Timdukal temsegrawent[1] deg uxxam n Sara, akken ad ɣrent, ad heyyint i lbak, meɛna: temlal mm uxenṭiṭ d mm uledda, kkrent ad grent aẓeṭṭa. Ass kamel nutenti d asewweṛ. Qqlent d “les instagrameuses”. Arrac akk i yeqqaren yid-sent ttabaɛen-itent deg yiẓeḍwa inmettiyen. Zgant d asentel deg yimawen n medden: Twalam tawlaft taneggarut n Sara d Muna? Kksent sster ɣef yimawlan-nsent rnant ɣef taddart!
Lḥasun nnan-d kra yellan fell-asent.
Imawlan n teqcicin-a ur d-cliɛen ara. Nutni ẓran ayen i d-urwen, ẓran ayen i d-rebban. Yerna, werǧin xedment kra n twaɣit, werǧint ukrent, werǧint ḍurrent yiwen. Tawaɣit i xeddment kan, d tiwlafin i d-srusuyent deg “Instagram”, aya ilmend n wat Taddart… i d tawaɣit.
Akka i d timetti anda ttidirent: axeddim-nsen ad ɛassen, ladɣa yessi-s n medden. Ugur, iyal wa yettɛassa yelli-s n wa, yal wa yettaggad seg wa, wa ur yettamen wa, mi ara mlilen heddren ɣef yessis n wiyaḍ! Cwi kan imawlan-nsent fehmen timsal, ur sellen i yimeslayen n wid yettawin ttarran am tissist yeggaren aẓeṭṭa.
Akka i ttɛeddin wussan n temdukal n tasa.
Lbak ur iɛeṭṭel ara, ladɣa s “l’instagrame”, bih nfih yewweḍ-d. Sara d Muna ttnejmaɛent ugar, akken ad heyyint ugar. Inelmaden yeqqaren yid-sent, mazal ttabaɛen deffir-nsent. Ma d aselmad n waddal yeḥbes.
Yiwen n yiḍ tekker ad tawi yemma-s n Sara iẓmi i teqcici yettheyyin i ukayad, akken ad asent-id-yefk tazmert ad ɣrent. Tuli ɣer texxamt n yelli-s, ssniwa gar yifassen-is. Mi tewweḍ, teldi tawwurt… A lhejna-k ay ul… Tufa-tent ttemḥemmalent…
[1] Ttnejmaɛent
