Tamurt-is, akken meẓẓiyet i tettimɣur. Meẓẓiyet s temlel i d-fergen yisuntimen. 21 di tehri ; 27 di teɣzi, asmi i tella di tewriqin ticebḥanin. Tettimɣur yal mi ara tenqec teqwirt-nni n yisuntimen s tgersa n lmidad ; temlel-nni, tettuɣal d iḍerfan, d iḥwiḍen, d tiregwa yettazzalen. Taqwirt iquzmen tasusmi n temlel, tettaǧǧa tadwilt i tayeḍ. D taqwirt tamaynut. Am tmenzut. Tehri-s : 21 n yisuntimen, teɣzi-s : 27 n yisuntimen. Tiqwirin-nni / tiwriqin-nni, ttuɣalent d isebtaren meẓẓiyen n udlis. Akken meẓẓi udlis i meqqer wazal-is.
Tamurt-is d asebter amellal i iḥemmlen win ara t-yeɣmun s lmidad am wakal bu yiḍerfan. D asebter ideg sbuɣuren wawalen ɣef tudert ɣas ḥekkun-d ɣef tmettant n tin εzizen…
« La plus que vive », d azwel n tmurt-agi. Nezmer ad t-id-nerr s teqbaylit « Tin yeddren ɣas temmut ». Nekk, mi kfiɣ taɣuri adlis-agi, yettban-iyi-d yif-it ma nsemma-as : « Teddreḍ ɣas temmuteḍ ». Acku adlis s timmad-is d awal iqesden bab-is. Ghislane. Tameṭṭut, tameddakkelt, taḥbibt n umaru n udlis-agi. Christian Bobin. D adlis ur nesεi tamtilt. Lḥasun, yewεer ad as-d-yaf yiwen gma-s. Acku d aḍris ur nziḍ am wiyeḍ.
D aḍris awḥid. D aḍris amxalef… Ungal, mačči d ungal, ɣas tinugla tella cwiṭ deg-s. Ur yelli d tullist ɣas akken kra n waktayen imsel-iten bab-is, amaru n udlis-agi, am teḥkayt yettlen ɣef yiman-nsen. D asefru yemgaraden d yisefra wiyeḍ. D asefru, ɣas tifyar-ines ɣunzant anyaten i ɣef mwatan yimedyazen, ama meqqrit ama d imunan. D annar n waktayen ihi ? Ur umineɣ ad yeqbel annect-a umaru-ines. Ɣas d asmekti, ur yeǧǧi win i d-iḥekkun « awadem-ines » deg yizri n tsiwelt (narration). Ula deg uzwel yettban-d wannect-a : La plus que vive (Teddreḍ ɣas temmuteḍ = ɣas temmuteḍ teddreḍ). D tabrat ? Ahat. Meεna, mi d-teffeɣ tebrat seg tjellabt-is, wissen ma ur tettuɣal d ayen nniḍen. Amedya : d tinigit ? Ahat. Wissen. Yezmer.
D aḍris iɣunzan ilugan i numen wid yeqqaren. D aḍris icebḥen. Wagi d ayen ibanen. Win ara iyi-d-yesteqsin d acu-tt tewsit (genre) n uḍris-agi, nekk ad as-iniɣ : d tira taseklant. D aḍris n Christian Bobin. D tasekla kan.
Muḥend Akli Salḥi
