Yezri useggas segmi i tebda Tengalt. Aseggas yakan. Si tuber 2022. Yal ddurt. Yal letnayen. Am tsegnit ittekksen aqraḥ.
D udem n wannar yettwarwaten mi ara tili ssaba. D cwiṭ n temkant i d-tḥerr teslit gar tnuḍin. Ɣas, meẓẓiyet, ddeqs i d-yettsewwiqen ɣer-s. Yal letnayen. Ssuq d lqeḍyan. Wa yuɣ, wa yeqḍa-d. Ssuq d tawafɣa. Wi i t-ikecmen yegla-d s kra. Ssuq d timliliyin. Wa yenna, wa yesla.
Tangalt, aseggas-is, yemmed. Lamer ad yani yiwen deg wussan-is, ad yaf ayen idergen ɣef wallen… ayen isdergen, ur t-walant wallen akken iwulem.
Tangalt, d abrid, gar wiyeḍ, yettawin ɣer tidet n temsalt. Tangalt, d taɣect icennun tizlatin yettwaḍerfen. Tikwal tettbeḥbiḥ. Ɣas yekkat-itt waḍu, yezga ṣṣut-is. Yal ddurt. Yal letnayen. Aseggas ayagi tura.
Acḥal d aḍris. Am limin. Yella. Γas aḥnat, yeddur-as-d taqernit. Acḥal d aḍris ? Anwa i ten-iḥesben ? Aha san ḥesbet-ten. Ad walim belli ddeqs. Ahat drus, ma ikenna-ten ufus iḥessben ɣer lebɣi-s. Lebɣi meqqer, tazmert ikcem-itt waεgaz.
Ddeqs n yiḍrisen. Wa d tɣuri, wa d azɣan, wa d tasleḍt (analyse), wa d tidmi (pensée), wa d asmeḍren (réflexion), wa d adiwenni… D iḍrisen i d-yeskanen udem i tsekla taqbaylit. Iḍrisen wiyeḍ… d imaynuten, sfilten ɣer wayen yelhan… ungal-nni imzerrer, d yiwet seg tdisa n Tengalt… tidewenniyin-nni yettakken taɣect i wat wawal, d anzaten i d-yesmektayen awal mi ara yettel yiles i as-yessnen neɣ mi ara yaru ufus i tedhen ccbaḥa… kra deg-sen d timakunin (merveilleuses), ttawint ameɣri ɣer tmurt n usugen d tsugna (imagination et imaginaire).
Iḍrisen, ddeqs. Kra deg-sen, d imru amaynut… d afus wayeḍ i d-yernan ɣer warwat n wannar aseklan.
Yezri useggas segmi tella tesɣunt Tangalt. Aseggas yakan. Nekk, walaɣ-t d taftilt, ɣas tettezɣuɣuḍ, temmal abrid i uḍar ileḥḥun.
Muḥend Akli Salḥi
