Yewweḍ useggas di tudert n Tangalt.  Tlul-d deg 28 Tuber 2022. Dɣa deg wass yecban ass-nni  i tba tgejdit Kateb Yacine. Tlul-d deg yiwet n tallit anda yella lḥers ɣef tlelliyin, anda daɣen yeqwa usnulfu di tsekla yettwarun s tmaziɣt, ladɣa taqbaylit. Acu-t  wassaɣ yellan gar lḥers d-yellan ɣef tlelli akked utuqqet n usenulfu (imi lḥers ur yesseḥbes ara asenulfu)? D tidet, yella udlis. Maɛna, cwiṭ-nni n tlelli yellan tergel-itt   tbirukrasit akked yir leqwanen yessefcalen s kra nwin yenwan ad d-yessebded ttawil (ama d aɣmis, ama tasɣunt) ara yemmalen amek i teddu yidles n tudert  di Tmurt.

Deg tegnit yecban tin i d-tlul Tangalt. Lebɣi-s iɛedda akkin i usiken n wamek iḥbbek ul n yidles di Tmurt : tebɣa ad d-tmel i lɛamma tasekla yuran s tmaziɣt, ladɣa taqbaylit. Tebɣ ad tt-tessufeɣ si tlisa n tmurt n leqbayel anda i tekmen. Lebɣi-s daɣen d asizdeg n wayen d-yettnulfun, s tallelt n widen d-yettarun yal ddurt. Ɣas ma yesefraḥ « waṭas », ilaq daɣen ad negzu belli mačči  d win i yettaken azal i tsekla. Lukan  i t-rbiḥ , d amsiẓreg ara d-yelhun d amezwaru s taluft-a n usizdeg.  Ttaqa deg-sen sedduyen tikkabunay-nnsen am akken ddant tḥuna n twella di tuddar.

Qqaren, wis dɣa ma tidet, Ccix Muḥend Ulḥusin yenna : « ddin, ddin, ddin… kulec atan din ».

Ma Tangalt teqqar : « tilelli, tilelli, tilelli… kulec din ad yili »

Di laɛḍil ad tili tlelli ara yefken tagnit i win yebɣan ad d-yessebded aɣmis, tasɣunt, tilibizyu, rradyu…, Tangal ur tetterriḥ ara i ṭbel deg waman : telha-d d unadi n ttawilat ara d-yeskecmen idrimen akken ad tbedd ugar, i lebda. Akken ad d-teffeɣ yal aggur di lkaɣeḍ. Akken ad ter lxir i wid akked tid s-yellan d lmendad. Sya ar assen, tesnemmar widen akked tiden tt-yeqqaren.  Tesnemmar, tettara tajmilt ladɣa, wid akked tid tt-icebḥen yal ddurt.

Tahar Ould Amar