D tabuciḍant, ass-nni…
A Ṭaw ɛzizen… Lamer ad teẓreḍ…
Ass-nni, wissen ma ad t-ttuɣ… d ass ixulfen ussan wiyeḍ… Nekk, ttnadiɣ fell-as ; netta, yettraǧu-yi. Ayen akk i steqsayeɣ fell-as, yettaweḍ-it usteqsi-inu. Inelbaḍen, d imeddukkal-is ; Imucaɣ, d imeddukkal-is ; aḍu yettawin yettarra, d ameddakkel-is… Sawḍen-as awal.

Taṣebḥit n wass-nni, ula d tafukt tsetḥa, teffer deffir usigna ur nesɛi udem ibanen. Tagnit-nni, tettakk anzi ɣer tawant, deg-s tasusmi taṛebbanit d tselbi yettecmumuḥen d wanyaten yesberbiren ɣef tudert.

(…)

Tiṭ-iw fell-as… tewhem. Imi-w, ibat seg wayen i isell umeẓẓuɣ d wayen i tẓerr tiṭ. Yella netta, yella waḍu. Di sin, seddayen tabuciḍant am zzerbuṭṭa deg ufus n win i as-yessnen. Aḍu, ifettel deg yijdi. Netta, ifettel deg wawalen. Aḍu, ireffed yesrusu lefrug n yijdi. Netta, ireffed yesrusu tiseddarin n yifyar. Aḍu, yettzuffu d inifif, yettezzi yijdi ɣef yiman-is. Netta, anyaten d tissay, ṭṭafaren aḍu deg uzḥal-ines. Ttalin mi ara yali, ttrusun mi ara ires. Ifassen-is, rennun i wanya ccḍeḥ i as-ilaqen am tesfifin ɣef lqedd iqeyysen yettsiffin tikkelt s wammas tikkelt s tayet… di nneqma n tzeɣzeɣt d yisiḍ…

Mi yezri waḍu-nni n yisefra i d-yesnekren tabuciḍant, teɣli-d tiɣli, keccmen yidammen n Bu-wanyaten di trusi yessismiḍen, tettruẓu cwiṭ cwiṭ tjeɣlalt-nni i semman d tiselbi, qerrbeɣ ɣur-s am win ara d-yeẓẓgen tafunast yurwen. Nemqarab, nemyeɛqal, nmeslay… Tameddit-nni, nesɛedda-tt akken… nekk, nniɣ-as ɣef wayen i t-id-qesdeɣ. Netta, yeggul ur iyi-iɣull, ḥacama yella wayen ideg yenneqraɛ yiles-is.

Mačči d yiwet ad am-tt-in-iniɣ… laqen yibeḥnaq n usigna d yigefran n lmidad… tamsalt, lqayet akken iluɣ wasif ikecmen deg ujdab n tḥemmalt. Imeslay-iyi-d ɣef ukukru igan d zzerb n usennan deg ubrid n tuɣalin-ines. Imeslay-iyi-d ɣef tisin n Bu-llebsa mellulen akka nnig meyya d aseggas ɣer deffir. Yenna-d yezga yerra iman-is am tmellalt n leɛcuṛ.

Ad am-in-alseɣ ayen i iyi-d-yules netta ɣef Bu-llebsa mellulen, yenna-iyi-t-id akken i t-id-yuweḍ d izen amzun d tabrat i yuzen Bu-llebsa mellulen i llemm-is d yimeddukkal-is. Netta, iḥekku-d fell-as ; nekk, ttwaliɣ iman-iw deg wayen i d-iḥekku :

Ttnadiɣ iman-iw. Bɣiɣ ad leqqmeɣ win yellan deg-i akken ad yuɣal d « nekk » i ttqellibeɣ. Ttḥawateɣ-t acḥal d abrid, sqazzbeɣ-as acḥal d abrid. Iwehha-iyi-d aṭas n yiberdan ; issefk ad ten-dduɣ ; lḥiɣ di yal yiwen alama sawḍeɣ tilisa-s. Syin, beddleɣ abrid, ɛniɣ abrid wayeḍ… akka i iyi-yura. Ma akka i iyi-yura neɣ d abrid-nni kan ur d-ufiɣ ?Ma d tarewla, ur telli deg ubrid ara k-yawin ɣer yiman-ik.

Yesmekti-d tikli-s d unemḍer-ines yettakken anzi ɣer unemḍer-inu :

Ddiɣ akken yedda ubeḥri ilmend n wakal amek iga. Tḥettem-d fell-i tsawent, teṭṭef-iyi tkessart. Zegreɣ iɣezran d yisaffen, uwin-iyi waman-nsen ɣer wanda ur bniɣ. Lḥiɣ adrar, akal werraɣen, akal zeggaɣen, akal ur nban d acu-t…Uriɣ akk udmawen n tmurt i yeɛfes uḍar-iw, uriɣ-ten akken i ten-yufa uḍar-iw. Kecmeɣ akk imukan… ala amkan-iw, ur ufiɣ ara.

Yerna-d ɣef usirem i yerra deg twenza-s d yiḍarren-is :
Uɣaleɣ ɣer wanda i d-kkreɣ ; ḍefreɣ later-iw armi d dinna ; ɣileɣ ɣas ur ufiɣ iman-iw anida nniḍen, meqqar ad steɛfuɣ cwiṭ seg tikli yessalwayen ussan-iw. Ur zrin ara ddeqs n wussan, fehmeɣ ula d tansa n temẓi-iw ur telli d amkan-iw. Fehmeɣ-t deg waṭas n tɣawsiwin… deg tmuɣliwin n wid i ssneɣ zik-nni, ttwalin-iyi-d am win i d-yuɣalen ad 89 asen-kkseɣ seg umur-nsen ! Am nekk am uberrani-nni ur nesɛi tansa gar-asen. Fehmeɣ-t deg tebrek n usigna yezgan yesberber ɣef temdint n temẓi-w seg wasmi rseɣ seg tmacint, asmi uwḍeɣ. Fehmeɣ-t deg ddiq n yiberdan n temdint, ǧǧiɣ-ten hrawit, qeblen akk imdanen, tura meẓẓiyet temdint akken ḍeyqen wulawen n wid ileḥḥun deg yiberdan-is. Fehmeɣ-t deg useyyeq i ttseyyiqen iberdan n temdint ; ttseyyiqen-tt snat n tikkal deg wass, mi ara ɛeddiɣ d mi ara uɣaleɣ. Ziɣ later-iw yessamas…Qerriḥet tiyita mi ara k-tagi temẓi-k… Qerriḥet tiyita mi ara k-yagi wayla-k… Ma yettraǧu-iyi umkan-iw, ad yili kan gar wulawen hrawen am tmurt ur nesɛi tilisa… Ur gezzmeɣ asirem, skud tettmeslay-iyi-d taɣect-nni taṛebbanit, yal mi ara d-tesṭebṭeb mayna di tewwurt n ddunit-iw…
« Mi yemdel tawwurt ɣef mayna, yeldi tawwurt n usirem. Imir, yufa iman-is deg umkan i t-yettraǧun ; yuɣal d ṣṣda i taɣect-nni taṛebbanit… Seg yimir, yekker ileqqeḍ isefra d wawal n Yimucaɣ. Netta, yenfeɛ at tmurt, yerna yefka i wiyeḍ ayen ur rǧin. Netta, tunṭict, teffeɣ afus-is ; nekk, d lweɛda, qewwteɣ taṛwiḥt-iw yis-s. S yisefra-s, ɛetqeɣ-d iman-iw »