Tiwririn ldint-ak tiwwura-nnsent , lǧemɛa yezrin.  Ass-nni, ad s-tiniḍ  inser-d i tefsut, Tafsut-nni  uɣur d-begṣed, Tafsut-nni  i wumi terniḍ tizegzewt , yerriḍ-tt s Asqif n Tmana di « Rivages ». Ɣas ulamma teẓmek teswiɛt, tessawdeḍ ad d-sbeddeḍ « Soummam »-nni  yernan sser i tmedyazt, ladɣa taqbaylit. 

Tenniḍ, turiḍ  ayen yessufiɣen ɣer leqrar. Tenniḍ-d asefru i cfawat,turiḍ « Nuit de noces » i d aɣ-yeksen ɛerayan am « La mise à nu » n Benhedouga. Ɣer-it  s tutlayt d ak-yehwan, d taqbaylit cekklen leqyud  ara n-tafeḍ. D leqyud-nni i yenwa ad yesseṣres « Nuit de noces ». Dɣa d « Nuits de noces »-nni i mlaleɣ, uqbel ad k-isineɣ. Iḥeqqa, ameddakul-nneɣ Djamal Arezki  yelḥa di tsuqqilt n unagl-ik n teqbaylit i turiḍ s tefransist.

Mmlaleɣ-k i  tikkelt tamzwarut di 2008, di temkerḍit n Brahim. Buddeɣ-ak ass-nni Bururu.  Ddurt-nni, yedda-d yicer n lkaɣeḍ fell-as di Midi Libre. Ih, ula d taɣamsa tcebbeḥeḍ-tt s yimru-inek.

Tameddit-nni n lǧemɛa, Tiwririn zegzawit, iṭij yesmelleḥ-itent ugar. Ǧerǧer iḍal-d seg yiwet seg-sent. Ula d netta yebɣa ad yili akked yimeddikal-ik d-iruḥen ad ak-inin : « gen di talwit a Lɛaziz !». Lllan akk din, ulad widen ur d-nruḥ ara uznen-d iḥulfan-nnsen. Yella, Rachid, Yidir, Malek, Brahim…d waṭas n wudemawen  ur sineɣ ara.  Iɛǧeb-iyi wawal d-yenna Brahim. Yenna-k « Lɛaziz d afellḥ n yidles ». Yufa-tt-id. Akken ma llan din mmeslayen-d ɣef lebni uɣer tekreḍ di Tezmalt, saki di Bgayet. Akken ma llan nnan : « Lɛaziz ur yeḥmil ara dderz akked «  aqli walit-iyi-d , yelha-d d leqdic ɣef tmaziɣt d yidles ».

Ɣas akken tudneḍ, ur teserḥeḍ ara i tbel deg waman. Yenna-k Rachid ur teqḍiɛeḍ ara layas ad d-sbeddeḍ tizrigin i tmedyazt. Yella-yak di lbal daɣen asuqqel n Murḍus ɣer tefransist. Ahat, ilmeẓyen d-itekkren ad cetlen seg-k, ad dd-un di later-ik.

Talwit a Lɛaziz. Siweḍ slam i umeddakul-ik Smail Oulebsir. Nḥemmel-ikun di sin.