Nna Dahbiya at Σmara d tillult. Tlul deg at Sellam, tezweǧ ɣer taddart n Tɣalaṭ, deg at Mlikec. Argaz-is, qqqaren-as Arezqi at Yidir (neɣ Arezqi Guwdiε). Tessefraw, tettawi-d merra ayen yeffren deg yidles atlay n teqbaylit. Fell-as i leqqḍent tlawin tamusni.
Deg lgirra-nni n 1954-1962, imjuhad gedlen ccemma d dexxan d tissit n ccrab. Send ad tekker, Nna Dahbiya, tella tettcummu ; seg-s akka, teḥbes, d tamara.
Mi sefsayen aldun, yeḥma useqqi, tuɣ-itt d tasalelt n yimsebblen i ixeddmen s adrar, i yimeɣrasen n FLN-ALN. Kra yellan d lḥif terfed-it, tezmer-as, ala win n ccemma. Teqqim « am win umi txus lḥaǧa ». Ad tcumm, ulamek, yettwagdel waluf ; ad tesber fell-as, mačči d ayen isehlen.
Yiwen wass, yekcem Ɛedreḥman Umira ɣer taddart-is, yezri s ubrid alemmas, iteddu ɣer uxxam n rifij ; mi yewweḍ metwal azrib n at Yidir, yaf din Nna Dahbiya ; msalamen, yesteqsa-tt ɣef lecɣal-is, ma yella ulac uguren imeqqranen. Temla-as ayen ilaqen ad t-isel, gar tuffirin d tudhirin i tesla neɣ i twala, tkemmel awal-is : « Sɛiɣ yiwet lbaḍna, ma ad ak-tt-mleɣ ? » Mi yeqbel asumer ines, tenna-as :
« Kapitan Ɛebderreḥman
Bu lagrunad ɣef taɣma
Sliɣ tfukkeḍ Arumi
Ad nerwu ssmid d lqahwa
Annaɣ a lwali εzizen
Nekk err-iyi-d ccemma
Aql-i heddreɣ ur ukiɣ
Am win umi truḥ lḥaǧa
Nnuɣeɣ-d akked lǧiran-iw
Gliɣ-d ula s Yamina[1] ! »[2]
Yerra-as Umira : « Tura, mi tewwḍeḍ ɣer Nna Yamina, waqila txefeḍ. Ruḥ ad tcummeḍ ! Agdal yexḍa iderwicen. » Cwiṭ kan, yebbetla-d, yerna-as : « Ass-agi kan, ah ! »
Yaḥya BELLIL
Aselmad n tmaziɣt
————————
[1] Nna Yamina at Ɛli, d tanuṭ n Nna Dahbiya. Semman-tt medden d lmalayek deg wakken i teshel, i terzen ; d lal n lxir ur yeḍfir wawal d uḥeccir. Werǧin tennuɣ neɣ tesneɣna kra n umdan. Win i tt-yewḍen armi yečča deg yiri-s. Ccemma tessaweḍ Nna Dahbiya ad taɣ deg-s s wawal.
[2] Asefru-a, leqḍeɣ-t-id ɣur teslit n Nna Dahbiya akked mmi-s n mmi-s, qqaren-as Busalaḥ at Yidir.
