Leḥuɣ, leḥuɣ, almi sliɣ i ucewwiq yesergagi meṛṛa tafeka-w, aksum-iw yecarrew. Qqen allen-ik, ad as-tiniḍ, ad d-afeḍ iman-ik di tmiṭ n Ǧerǧer. Qarbeɣ s anda d-yekka ucewwiq, tban-iyi-d terbaɛt n lxalat. Σeqleɣ Faḍma At Mansur akked yell-is Marguerite Ṭawes. Luɛaɣ-tent.
Tangalt : Azul fell-akunt !
Faḍma At Mansuṛ : Ɛeslama-am a yelli. Σeslama s rriḥa n Tmurt.
Tangalt : Rriḥa n tmurt da i tt-ufiɣ. Ferḥeɣ dayen kan mi kunt-mlaleɣ a Nna Faḍma. Yak ulac deg-s ma sawleɣ-am nna Faḍma ?
F.A.M : Ihi amek a yelli, yak mazal-ikun teqqarem nanna, dadda ? Nekk a yelli mazal-iyi d taqbaylit, ɣas ulamma taqbaylit-nni n jmaɛliman teskufera-yi.
Tangalt : Ẓriɣ, neẓra meṛṛa i iɛeddan ɣef uqerrum kem akked yemma-m Ayna deg At Dwala.
F.A.M : Anef kan a yelli. Akka i d ddunit. Akken i d timeti n tallit-nni. Laḥsun Tudert-iw mačči ḥala imeṭṭawen. Ddreɣ talwit akked tenfuli asmi mmlaleɣ Antoine Belkacem. Dɣa mi d-yerna Lmuhub , Tawes, Paul-Mohand-Said, Henri-Achour, Louis-Marie, Louis-Mohand-Seghir, Noël-Saadi akked René-Malek
Tangalt : Ad am-ten-yeḥrez Rebbi a nna Faḍma.
F.A.M : Iḥrez-ikem a yelli. Anda teddiḍ, Jésus yedda yid-im.
Tangalt : Suref-iyi a nna Faḍma.
F.A.M : Acimi a yelli ?
Tangalt : Nniɣ-am-d ad am-ten-yeḥrez Rebbi. Ttuɣ kem d tamasiḥit.
F.A.M : (Teḍsa seg ul-is) nnaɣ a yelli, dagi ulac amasiḥi, ulac ineslem, ulac uday… Mazal ttkellixen-kun s tmsal-a n tdiyanit. Aha, ini-yi-d, amek tellaTmurt, Iɣil Ɛli, At Dwala ?
Tangalt : Bedlent tuddar n leqbayel. Ayagi teẓriḍ-t, tezram kulec deg umkan-a n wis d acu-t
F.A.M : D tidet, neẓra kulec. Ula d ayen tettaruḍ neqqar-it.
Marguerite Taos Amrouche : Dɣa, ɣriɣ tadiwwent-nni yellan gar-am akked Abderhamane Bouguermouh. Tesmekta-yi-d deg useggas-nni mid-ruḥ ɣr lezzayer ad kkiɣ di tmeɣra n tefriqt.
Tangalt : Azul a nna Tawes. Ulac deg-s ma sudneɣ-kem.
M.T.A : (tḥennec-iyi s idmaren-is) a rwaḥ a sser !
Tangalt : Anect n zher i sɛiɣ.
M.T.A : Acimi akka ?
Tangalt : Mmlaleɣ-kem akked yemma-m. LmuhUb ulac-it ?
M.T.A : Yella, wis kan s anda i yerra. Lmuhub-nneɣ ur yetkid ara deg yiwen wemkan.
Tangalt : ihi, teɣriḍ ayen d-yenna dda Abderahmane ?
M.T.A : Γriɣ-t. yesendef-iyiacemma. Mmektaɣ-d aseggas-nni ideg d-ruḥeɣ ɣer Tmurt, ad cnuɣ ziɛematek di tmaeɣra n tefriqt. Aseggas-nni i mmlaleɣ irgazen d leknuz. Saεid Saεdi akked imeddukal-is n tesdawit, Ccrif Xeddam…
Tahar Ould Amar
