«
Ṣubbeɣ-d, ṭṭalleɣ d asawen, afeɣ iṭij yeqqim ɣaf ukwersi-s deg yigenni ma d yemma teqqim ɣaf ukwersi-s deg ufrag. Σewjeɣ akw, iɣsan-iw ṭṭerḍiqen, tigecrar-iw ttergigint… Adrar-nni, bqa Ɛla xir, ay Aqbu. Kecmeɣ ar texxamt n waman, ccfeɣ s yeḥmayanen, meqqar ayen uzzleɣ akw ɣaf lgaz deg Tuber d Dujember-nni yezrin, yeffeɣ leεtab ar tafat. Mi fukeɣ tuccfa, rniɣ qqimeɣ ciṭṭuḥ sdat n yemma, neṭṭallay tamecmact-nni d yiceḍbuben-nni i d-gezmeɣ, ters-ed tsusmi. »
Letnayen, 12 Fuṛar 2024
Ay abeḥri i d-iṣuḍen
Iḍelli i d-rseɣ deg unaffag Sumam-Σebban Remḍan n Bgayet. Afeɣ-d tewwet, tamurt tdel-itt tizzegzewt, ffɣen-d yizeǧǧigen d iwraɣen, ssan igran.
Mi d-rseɣ seg ufurgu, d abrid ar taddart, mmugreɣ-d M. At L.
- Ha-t-an zzin-d yeɣriben-nni.
- A d-nezzi kan. Wamma ihi ad neǧǧ amur-nneɣ deg tmurt ?!
- Tamurt texla ; anda-t akka wamur ?
- Anda texla akka ? Ha-tt-an teǧǧuǧǧeg akw, teqqareḍ texla. Drus i tewwet ?
- Ih, tewwet, d acu, iskwef-itt akw ubeḥri.
- Aww ! Ihi teɣli-d amzun ur d-teɣli ?!
- Akka i d-qqaren yemɣaren ; kečč dihinna ahat tettuḍ akw tilufa-ya n tfellaḥt.
- Nek nniɣ-as a d-tewwet, ad isew wakal, d aya i yellan.
- Γaf akken d-qqaren yemɣaren i d-icfan, iwwi-d aman ad awḍen arma d aẓar n ttejṛa, arma d lƐeqwda-nni.
- Ihi ma yewwet-ed ubeḥri d aqesḥan, a tt-isew akken deg yigenni, ur tettaweḍ ara ar wakal.
- Akka i d-qqaren yifellaḥen.
- Ta d tin akken i s-inna Uṛumi : « Un coup pour rien. »
Ttlata, 13 Fuṛar 2024
Tamecmact-nni
Ihi aman ɣlin-d, abeḥri iṣuḍ-ed ussan yezrin ma d ass-a d-iṭij, ur s-teqqareḍ ara d tagrest. Nniɣ i temɣart n yemma (nettat 83 kan d aseggwas, 99 d aṭṭan, d acu, teqqar awi-d kan ad nedder ; llan yilemẓiyen, ur Ɛad bdan tikli, a k-qqaren neƐya deg ddunnit) :
–Kker a m-iniɣ, ṣubb-ed tura seg wusu, teffɣeḍ-d ar wefrag ad nezziẓen iṭij ɣaf yiman-nneɣ.
–Yah ? D iṭij ! Aḥeq Aẓkuk arma kkreɣ-d ihi.
Tṣubb-ed seg wusu s tin n nnƐi d lmeḥna, teḥrurd-ed s tin n nnƐi d lmeḥna armi d afrag, taƐekkwazt mm ṛebƐa n tfednin deg uyeffus, tin mm yiwet tefdent deg uzelmaḍ. Sɣameɣ-tt ɣaf ukwersi, serseɣ-as tasumta ad tsenned, qqimeɣ sdat-es.
– D iṭij amzun d ṛṛeḥma.
– Aha kan zziẓen ɣaf yiman-im, ad nqesser ciṭṭuḥ, ad aliɣ ar wedrar.
– Ar wedrar ? Ur d-teqqimeḍ ara Ɛad, ad taliḍ ya ar wedrar ! Sres iman-ik ad testeƐfuḍ.
– Deg udrar i steƐfayeɣ, nek. Ad nƐettabeɣ deg ukeddaṛ-ihin, ur tettaweḍ ara ssaƐa, aql-i i usawen qqimeɣ ɣaf yiri n Tala Iḥemmaṛen. Aman ad ttceṛcuṛen, siwa tisita d yiƐudiwen i d imwansen.
– I tmecmact-ihin ?
– D acu i tt-yuɣen tmecmact-a ?
–Wali talemmast-nni ; ilaq-as win ara tt-ifersen.
– Ya la la la !
– Tettwaliḍ acḥal iseggwasen aya ur tefris… A k-d-rnuɣ tayeḍ : tiẓeppujin-nni n Tigert Imeɣdasen, ilaq-asent win ara tent-ileqqmen.
– D aya kan i kem-irḥan ! Wwiɣ-d takwemmict n wussan, ad ferseɣ ad rnuɣ ad leqqmeɣ ! A lxir-iw !
– A lxir-ik, ih !
–- Tura ma d tamecmact-ihin, ahat a s-zemreɣ, awit-aɣ-d kan tamencaṛt ; ma d aleqqem, ur ssineɣ ad leqqmeɣ, ur ssineɣ win yessnen ad ileqqem deg taddart-a.
Tamencaṛt yeḥfan deg ufus, uliɣ ɣaf tmecmact-nneɣ. Wwet s uyeffus arma yeƐya uyeffus, wwet s uzelmaḍ arma yeƐya uzelmaḍ, wwet s sin yifassen ma tweƐƐaḍ… Kra s yiɣimi, kra s yibeddi, kra s uqummec, kra, aḍar dihin, wayeḍ da, wwiɣ-d nnig n snat tsaƐtin nek d afras armi kkseɣ ayen yeqquren, sbaneɣ-d tafat deg tlemmast n useklu.
Ṣubbeɣ-d, ṭṭalleɣ d asawen, afeɣ iṭij yeqqim ɣaf ukwersi-s deg yigenni ma d yemma teqqim ɣaf ukwersi-s deg ufrag. Σewjeɣ akw, iɣsan-iw ṭṭerḍiqen, tigecrar-iw ttergigint… Adrar-nni, bqa Ɛla xir, ay Aqbu. Kecmeɣ ar texxamt n waman, ccfeɣ s yeḥmayanen, meqqar ayen uzzleɣ akw ɣaf lgaz deg Tuber d Dujember-nni yezrin, yeffeɣ leεtab ar tafat. Mi fukeɣ tuccfa, rniɣ qqimeɣ ciṭṭuḥ sdat n yemma, neṭṭallay tamecmact-nni d yiceḍbuben-nni i d-gezmeɣ, ters-ed tsusmi. Deg tama iɣaḍ-iyi lḥal zegleɣ adrar ; deg tama umreɣ s ciṭṭuḥ umahil-nni i yi-d-irran armi d temẓi asmi ttaliɣ ɣaf yisekla, d tiselnin, d tizemrin, d tibellṭin…
InƐel waldin n ttilifun
InƐel waldin n tiliẓri
InƐel waldin n ṛṛadyu
Anfet-iyi ad ferseɣ
Ǧǧet-aɣ ad newwet amencaṛ
InƐel waldin n lbabuṛ
InƐel waldin n ṛṛuplan
InƐel waldin n tmacint
Anfet-iyi ad ferseɣ
Ǧǧet-aɣ ad newwet amencaṛ
InƐel waldin n ssinima
InƐel waldin n yedlisen
InƐel waldin n ikweṛṛasen
Anfet-iyi ad ferseɣ
Ǧǧet-aɣ ad newwet amencaṛ
InƐel waldin n Facebook
InƐel waldin n Instagram
InƐel waldin n Tiktok
Anfet-iyi ad ferseɣ
Ǧǧet-aɣ ad newwet amencaṛ
Yidir AMER
