Deg tallit-nni deg i tella Fransa da , llant temnaṭin tebna deg-sent ixxamen n ccreε. Yal axxam tesbedd-as lǧuǧ ad yeḥkem s lqnun i yessen netta. Maca mačči medden akk ttarran ɣer din bac ad frun tilufa-nsen.
Yiwen urgaz(amɣar azemni, akken qqaren), d bab n leεqel, tilufa n taddart merra d netta i tent-iferrun(zwaj, inebran, beṭṭu, ṭṭrad ɣef tlisa…) ; uma d tid n yimezdaɣ n tuddar id-yezzin i taddart-is. Ur yeɣri taεrabt, ur yeɣri tafransist. D taqbaylit kan i yessen: yessen leḥsab n wussan, yessen tilisa n yiḥerqan, yessen leεwayed, ṭṭbayeε yimdanen ; yessen leεṛuc, iderman, tiεrifin d iẓuran-nsen… lḥasun, tamnaṭ-nni yessen akal d wayen ibbub d wayen i yellan deg tegnewt iεellqen nnig-s.
Lǧuǧ id-tesbedd Fransa iḥewwes ad yefhem, i mi drus medden i yettruḥun ad frun tilufa-nsen ɣur-s.
Nnan-as belli i iferrun tilufa n medden deg temnaṭ-a, d flan. Yebɣa ad d-yawi s lexbeṛ amek i asen iferru lecɣal-nsen, iruḥ ɣer-s afus aṭar ad t-yesteqsi. Yuweṭ, yenna-as:
– Tuget yixṣimen n temnaṭ-a ur ttcaraεen ara akk deg uxxam n ccreε n yIṛumiyen. Nnan-iyi-d ttruḥun-d ɣer-k ; yerna ur tḥekkmeṭ la s tin n ddin, la s laqunun n Fransa.
Amek i texddmeṭ i yexṣimen akken ad tefruṭ tilufa-nsen?
Amɣar-nni azemni, mi yesla i usteqsi-nni, ur yebɣi ara ad as-yefk tidet tekmel, yerfed aqerruy-is, iṭal ɣer-s, yenna-as:
– Mara d–asen sin yirgazen lεali, s wawal kan ad tt-fruɣ, ur yelli d acu yuεren deg ccɣel-nsen. Mara ad d-asen sin, yiwen d argaz lεali wayeṭ d amcum, ttekkseɣ-as-d i urgaz-nni lεali, rennuɣ-as i umcum ; akka sursaɣ-d lehna.
Lǧuǧ-nni yettraju ad ikemmel ameslay, win yessusem.
Irna isteqsa-t:
– I mara ad ak-d-asen sin, d imcumen i sin?
– Widak-nni, ttceyyiεeɣ-ak-ten-d i kečč. I as-yessegra.