Anz…ul, d azwel n tmezgunt i tessuli terbaɛt n Yitran n Tqerbust anda i d-uraren sin n yinaẓuren s wazal-nsen, Nasira Ben Yusef d Mexluf Awdiya. Tamezgunt-a tewwi-d awal ɣef Kenza, yiwet n tlemẓit yugin ad tebru i yiman-is sdat tidderwect d wayen i as-d-texlef tudert tedder.
Kan akken d taqrurt, teḥḍer i wasmi yegzem ssif n yirebraben taqerruyt-nni n baba-s yessenz fell-as akken nettat ad tidir, mbeɛd mi tt-yeffer daxel n wanu akken ur tt-ttawḍen ara yiɛdawen-nni n tudert. Seg yimir tettidir s usirem n wass ideg ara d-yuɣal baba-s, amer ahat tella tudert mbeɛd lmut. Tedder di tsussmi, di tatut, di temḥeqqranit, abeɛda n wid tefka tewwurt ɣer berra i icuban ɣer yiqjan, ala Lunǧa, taɛelǧet-is i as-yellan d tamwannest, tettmeslay yid-s xas nettat d tagugamt ur neneṭṭeq.
Acḥal d abrid tsuɣ s baba-s-nni yemmuten, ahat ad yili wanza-s d win ara tt-id-yessuffɣen si lqaleb i as-d-teḍbeɛ tmetti-s, meɛna acḥal tsuɣ ur as-d-yesli, yeɛɛuẓẓeg ula d netta akken tɛuẓẓeg tmetti ɣef tlelli n tmeṭṭut. Tendeh, tessawel, tɛeggeḍ, yiwen mačči yesla-as-d, ula d Lwennas, ilemẓi-nni yesxuxden ul-is, ur as-d-yesli, ula d netta yugad abrid n tlelli limmer yella wanda ara t-yawi, ula d netta ziɣ yella di ṭṭabeɛ-nni n tmetti. Andah tendeh s yidammen-is d tin n wul-is, ur yelli wacu i as-d-wwin, acu kan tuki-d si tidderwect d tgugemt-nni ideg tella imi teḥsa abrid-nni ideg tebɣa ad teddu, d nettat kan i izemren ad t-tenǧer. Tezwi akkin tidderwect-is, tuki d yiman-is, s wazal-is, tekker sdat wannuz-nni i tunez i at iqerra iberkanen, tenna:
Ẓriɣ aṭas i turǧiḍ
Ass-a d ass ajdid
Ass-a i ffɣeɣ ɣer berra
Lḥiɣ qebleɣ i qubleɣ
Sliɣ i lḥeḍra
Acḥal-aya ur ffiɣeɣ
Acḥal-aya i ffreɣ
Yerna mazal-iyi ad ffɣeɣ
Ddunit-agi ad tt-qablaɣ
Timsal i ugiɣ ad qableɣ
Ddunit-a ur ttɛacaɣ
Azekka ad iyi-tneɣ
D awalen i d-tewwi s yiwen ssuṭ ḥlawen, yezzuzunen ulawen, d ayen i as-yernan i tmezgunt-a ccbaḥa-nniḍen. Ihi Anz…ul, d anza n wayen yellan d ul n tmetti nenɣa-tt nerna-as tilelli-s almi tuɣal tettnaɣ d yiman-is, d anza n wid yemmuten, d anza n wayen akk nebra d wayen nettu.
Tilelli Bellal
