Tilelli tecbeḥ. Ttnadin fell-as Yimdanen yessnen azal-is, i tt-yettqadaren.
Widen i tt-yebɣan, ttargun-tt ula deg uzal qayli, wamma deg yiḍ atan iban.
Kra ttagin ad d-akin, uggaden ur tt-id-ttafen ara.
Kra ttcukkun deg tilin-is maca ttraǧun-tt, ttganin-tt deg yiberdan iseg tettɛeddi, ssaramen ad tt-id-mlilen !…
Kra sserwalen-tt, tikkwal d nettat i la irewwlen fell-asen.
Dɣa nudaɣ ad ẓreɣ anwa amkan ideg rseɣ iwakken ad tt-ɛasseɣ :
-Ɣileɣ d amdan ilelli ilemden azalen n tudert,
tilawt n tudert teskaddeb-iyi.
-Ɣileɣ d amdan ilelli izeglen iberdan izelgen,
ziɣ widen ur nezlig reglen.
-Ɣileɣ d amdan ilelli yewwḍen s iswi s tikli,
teḍḥa-d tikli tettdawi tisselbi.
-Amrar yurzen iḍarren yerra ifassen i tikli,
qqlen yiḍudan d tifednan.
Ttmurudeɣ kan…
-Ttraǧuɣ tilleli imi ttwarzeɣ,
ttraǧuɣ tilelli gar tlisa.
Ttraǧuɣ kan…
-Ṭṭafareɣ widen yettemseḍfaren,
ṭṭafareɣ widen yezwaren.
Ṭṭafareɣ kan…
Ay abeḥri ay ilelli,
ttxilek mel-iyi,
tilelli ma d awal kan !
Ziɣ ttwaḥebseɣ deg umaḍal n unadi ɣef tlelli !
Gar ukmam d umadwan i la ttraǧuɣ tilelli
Ɣas ruḥen yiḥulfan-nni
Ruḥen glan s lebɣi
D leḥrara n unadi
Ɣef tlelli
Ur nelli…
Am wakken i nnumeɣ, ad d-iniɣihi aya d tikti kan !
S wawalenilelliyen i d-mmeslayeɣɣefwayen i yi-d-iṣaḥen.
Ramdane Abdenbi
Amaru