… Kra n win steqqsaɣ, ad iyi-d-yini, tebbet leεqel-ik a winnat. D tidet, ass-a d ttlata, meεna d ass wis sin deg waggur n yulyu mačči d wis 9. Atan εni yexleḍ-ak lavuns d rruṭar ay acrik …
Nniɣ-as deg wul-iw, waqila mcawaren fell-i. Ffɣeɣ-d. Ttedduɣ steqqsayeɣ. Ay ass amcum, ziɣ yiwen-nsen ! Kifkif-itent akkit tririyin-nsen.
I tura lhant fell-i ?! Ad yelfu bbehbaɣ neɣ ahat d tidet, fkiɣ-as ddurt si tudert-iw i winna akken ukud mbaddaleɣ nnuba. Ɣilleɣ d ttkeεrir. Fhem-itt tura kečč a Ḥemmu Ssaεid, tessefruḍ-as-tt i Berḍebba !
Wwteɣ ɣer uttezḍam, ad d-ssufɣeɣ ttbut, l’ordonnance-nni i yi-d-yefka umejjay-iw, ah ! Nniɣ-as ad waliɣ dɣa melmi akka iyi-tt-id-yura. Ulac. Ur ufiɣ iqiḥ yettaken anzi s iccer n lkaɣeḍ ula deg yiselsa-nni yedlen iri-w.
Uɣaleɣ armi d laklinik-nni. Tqusem-iyi-d tefremlit n Meddur. Mi as-ssegzaɣ taluft, tεudd la shetrifeɣ neɣ wwteɣ-tt meḥnenneḍ. Ur skiṛeɣ, ur yelli. Tessaweḍ armi i yi-d-tezzaken attafttar-nni ideg tettaru umuɣ n yimuḍan yersen i wass-nni. Ulac deg-s ula d rriq n yisem-iw. Yettusemma ur d-sεeddaɣ ara ɣur-sen ass-nni.
Mačči ḥala tagi umi uḍneɣ aɣbel. Kra n wayen i d-mmektaɣ, zun giɣ-t seg wass n ttlata 2/7 alarmi d ttlata n 9/7/2024 n wass-nni, ur yettnuḥ ula d iqiḥ n ttbut fell-as. Amzun ur tt-ddireɣ ara maḍi ddurt-nni tamcumt. Tamudi n 7 wussan d 7 wuḍan, ur bdin ur nnin, i yi-ruḥen di rrayeε. Yeḍḥa-d ttwaqecεen ɣas ddreɣ-ten. Ttwasefḍen si tudert-iw ur nhun. Yekcem-iyi lḥir ugar. Umneɣ, ur umineɣ ad teḍru yedyant am tin yid-i yeḍran.
Ih ! Si zik-iw, mti ad tqellqeɣ, ttarraɣ-tt i usniffer ; igirru deffir wayeḍ. Ass-nni, segmi mlaleɣ ḥerra n sekkak-nni bu tzuɣmaz di lbanka, ur d-iwit ara yakk wul-iw ɣer-s ula d abrid. Ad teggalleḍ ur tḥennteḍ ar as-tiniḍ werǧin keyyfeɣ. Teḍra-tt yid-i am win ara yezzren deg yiḍes n meɣrud tamudi n ddurt, ulamek ara ikeyyef di tnafa, dimi i yemsa dduxxan-nni…
Tezzi-d ddurt. Qqleɣ ɣer laklinik Tudert. Nniɣ-as ad d-sεeddiɣ daɣen iwakken ad iyi-d-rnun xersum ddwa-nni i yi-tekksen taqbert.
Mi iyi-inuda Duktur Meddur, yewhem. Sεeddan-iyi-d ula d askanir. Imeḥḥes-it. Yettani deg-s irennu. Yedhec, am win ur numin ara allen-is. Iseffeṛ. Ttraǧuɣ kan amek ara yi-d-yini belli dayen, yebda-yi-d lkunsir. D acu ara yi-d-yini ? Yenna-yi-d :
– Cerheɣ imi tufiḍ ɣer ddwawi-nni i ak-n-ttakkeɣ ayagi iεeddan. Ɣef wakka ttwaliɣ, ad iniɣ teḥliḍ a nngeḥ-ik ! Ulamma nniɣ-ak-n akka, meεna, kemmel-asen i sin n ddwawi-agi, ara ak-n-mmeṛkiɣ, tamudi n waggur ; tuɣaleḍ-d ɣur-i gar-aɣ d useggas, ma ur k-id-tuɣal ara kra n tusut akk d teqqbert-nni.
Ffɣeɣ-d. Niqal kkreɣ ad rreɣ s afermasyan. Uɣaleɣ mmektaɣ-d adrim amcum. Isurdiyen swayes gliɣ assen, mi d-ffɣeɣ seg uxxam, ǧǧiɣ-ten-in merra di Tudert. Askanir-nni kan, berka. Mačči d ka yettqiddin.
Snagreɣ ɣer lbanka daɣen, ad d-jebdeɣ meqqar cwiṭ-nni n lufer i n-ǧǧiɣ di lkunt. Fiḥel ma jeggḥeɣ ccik-nni i yi-d-yerra winna umayna. Afeɣ-n drus n ugani. Iṣaḥ-iyi-d wuṭṭun wis 5.
Ata yusa-d ɣur-i yiwen. Iluεa-yi-d. Simi i yi-d-yesteqqsa, εeqleɣ-t di ṣṣut-is. D bu tzuɣmaz-nni n wasmi akken.
Yenna-yi-d :
» Iban akka ur yerwi ara zzrir-ik tikkelt-a. N wacu εni uṭṭun i k-id-iṣaḥen ?
Zzakkneɣ-as-t ur uḥtameɣ.
– 5 ? Ad yelhu.
– Ad yelhu kan.
– Yya ad ak-iniɣ !
– D lxir ?
Yessenεet-iyi-d ajuṭun-ines. D uṭṭun wis 22.
– Ihi ad nembaddal. Ax-n abandu-k, err-iyi-d lxamsa-w. Yak lxir, d areṭṭal.
Cmumḥeɣ-as acmumeḥ n win iran ad t-yesteqqsi ɣef tedyant n wass yecban ass-nni.
Yejleq-iyi ajuṭun-iw, daɣnekk lxamsa-s ; yerra-yi-d abandu-w, riɣ ad d-iniɣ, ajuṭun-nni wis 22 i tuɣ deg ufus-is. Simi nembaddal, yeznuker am nnda. Yeffeɣ. Ur iyi-d-yenni la zzant wala rɣant. Yeǧǧa-yi-d aḍu n tisselbi ɣer deffir.
Ata diɣ wwint-iyi lwehmat. Reffdeɣ, srusuyeɣ armi i d-tewweḍ nnuba-w ur faqeɣ.
Jebdeɣ-d idrimen-iw. Rriɣ srid s afermasyan-nni. Akken kan i as-fkiɣ l’ordonnance, iwala isem-iw akked sin n ddwawi-nni i yi-d-yura deg-s duktur Meddur, yenna-yi-d :
– Ihi yessenɣes-ak-d ddwawi umejjay-ik ! Ad tawiḍ kan sin-agi ; ad kkseɣ wigi-nnaḍen ?
– N wacu wigi-nniḍen ?
– Wigi yakk i ak-rriɣ di rrif mi d-tεeddaḍ seglinna ? Ɛni tettuḍ ?
– Awi-d ziɣ lkaɣeḍ-nsen.
– Tebɣid ad d-tiniḍ, l’ordonnance ?
– Ih !
– Yak rriɣ-ak-tt-in ; tewwiḍ-tt yid-k !Mer i yi-tt-id-teǧǧiḍ da, ad tt-id-tafeḍ da, gar ddwawi-agi-inek i ak-rriɣ ɣer tculliṭ-agi iɣef jerdeɣ isem-ik …
Xellseɣ-as-ten merra. Wwiɣ-d kan sin-nni iɣef i yi-wessa duktur Meddur. D widak kan i ḥlaǧeɣ. Wiyaḍ, nniɣ-as i ufermasyan, ad ten-yefk i walebεeḍ n yigellilen. Wwteɣ εeddaɣ. Ffɣeɣ tuffɣa n uberriq deg uḥriq. Ssuffɣeɣ yakk seg uqerruy-iw war tifrat-nni i yi-yerwin abelɣis-iw. Ma nudaɣ ad gzuɣ tin yeḍran yid-i ass-nni, ugadeɣ ad yeqqers cwiṭ n yinziz-agi iss yeṭṭef lman wallaɣ ageswaḥ.
I tura, amek akken ?
Ad as-nanef kan ar qabel, ma nedder, ad qqleɣ alamma d Duktur Meddur. Syin akkin ad nwali.
Rachid Tighilt
