… Nɛedda i lɛerc n At Buɛekkac, nekcem win n At Wasif. Yebbuḥra lḥal acemma. Rradyu n Tizi-wezzu tesedha-yaɣ s tuɣac n Lḥesnawi. Dɣa di tlemmast n « Lǧazayer tetthewwel », tessaweḍ-d yir isali : Ḥasan Ɛebbasi yewweḍ leɛfu n Rebbi. « Ah ya ddunit ! » iba unaẓur ur d akem-yefhim. Acimi d-ilul, acimi ara yemmet ? Ahat, anda akka yewweḍ ad asent-d-yaf tifrat i tuttriwin-is.
Neffeɣ i Tqiccurt, qrib ad nekcem Tizi n Letniyen, teḍher-aɣ-d yiwet n temɣart tettraju afurgu, rrif n webrid. Neḥbes tama-s, neɛqel-itt : d Nna Ɣni teqqen azal n setta izebgan n lfeṭṭa :
– Azul a Nna Ɣni. Erkeb-d ad kem nessiweḍ.
– Iḥrez-ikun a tarwa. Awi-d akka afus-ik, ɛiwen-iyi-d ad n-rekbeɣ.
– Sani akka a Nna Ɣni ? I Ǧamal-nni, ɛni ulac-it ?
– Ǧamal ! Anef-as kan i Ǧamal.
– Acimi a Nna Ɣni ?
– Nniɣ-ak anef-as kan. Ddurt ɛeddan, ǧǧiɣ-as Micka-nneɣ, nniɣ-as ad t-iɛas, ad ad-yelhu yes-s…
– Micka ?
– Amcic-nneɣ. Dɣa d Ǧamal i t-id-yesnulfan : « … Micka d amcic azubaɣ n Dda Lḥaǧ akked Nna Ɣni. Lawan n tẓallit, ad d-ters tẓerbit mezleg akka cwiṭ. Amcic ad iwexxer, ad iqerren Dda Lḥaǧ ad yeẓal Micka s idis-is…. »
Terfa s ditet Nna Ɣni. I Ǧamal d acu n tmara i tyerran ad tt-ibud s Micka ? Akka i tasekla, tezmer i kulec. Newweḍ Larba At Wasif, nessaweḍ Nna Ɣni and ḥbbsen ifurguten n Taddart-is, nsellem fell-as, nkemmel abrid ɣer tlemmast n Larba. Neḥbes tama n yiwet n lqahwa, ners-d si tkerrust, neɛqel Ḥelwan Ḥasan. Aqrab ɣef tayet, ileḥḥu am win i iḥaren ad yaweḍ wis sani.
– Wa dda Ḥasan !
Yerfed aqerru-is, imuqel akka d wakka, iwalayaɣ-d, yecmumeḥ.
– D kuniwi aya ! Ansuf yes-wen s adrar.
-… S « Adrar ay yuccen » a dda Ḥasan. Ad nemlil tlata tregwa-nni yeɣzen iɣzer.
Yecmumeḥ daɣen dda Ḥasan, yeẓra ɣef acu nettmeslay. Iwehha-yaɣ-d tawwurt n lqahwa :
– Ahaw kecmet-d, leqhawi sɣur-i. D lqahwa kan i yellan da, ayen nniḍen argut-tt.
– Wa dda Ḥasan, maɛlic ad k-steqsiɣ ?
– Ihuh, steqsi ɣef yiman-ik !
– Yettusemma asteqsi-a teɛwiḍ deg-s.
– Steqsi, ma iɛǧeb-iyi ad kd-rreɣ ; m ur d iyi-ɛǧib ara, ur d ak-d-ttaraɣ ara, rnu d keč ara ixelsen leqhawi.. Vas-y , s teqsi !
– S tidet kan, ini-yi-d ttxil-k, ur tesḥassfeḍ ara ɣef tuɣalin i d-tuɣaleḍ ɣer tmurt ?
– S tidet, yečča-yi usḥissef ɣef wayen…i neqqimeɣ dinna. Ur ttidireɣ ara 100 n yiseggasen, limer ad iyi-ttunefken, ur ɛeyyuɣ ara. Ma d tamuɣli kan ara ttmuquleɣ ayen iyi-d-yezzin : d imudaɣ, d tiqucac iɣef rsent tudrin, ma yella ad qqimeɣ ad selleɣ i tudert tzehher deg yifrax, deg wuccanen i yessawalen akken ara d-r=tas tmeddit…ččiɣ, swiɣ !
Tahar Ould Amar
