Souveraineté du vide. Suivi de Lettres d’or. Nniɣ-as ahat ad as-yezg s teqbaylit : Tazmert n yilem. Yeṭṭafar-it-id Tibratin n ureɣ. Deg udlis-agi, yessemlal Christian Bobin deg yiḍrisen-is tayri d temẓi d tira (ixleḍ-itt d tɣuri) ; s temlilit-agi, yebna iḍrisen-ines am tebratin ; anadi ɣef tidet, yessebded-it Christian Bobin ɣef temlilit-agi tasentalant ; yis-s ad yaweḍ yiwen, xersum, ɣer tidet i t-izedɣen netta s yiman-is, deg yiman-is.
Azwel n udlis, yecbeḥ, d ayen kan. Aɣanib n tira, izad ; iga am win yettazun, ittekkes aglim ɣef wayen i iɣum akken ad iban umeslux. Tikwal, yettqazam umennay (l’énonciateur) win i wumi yettmeslay. Tikwal, yettaṭṭaf-as afus akken ad t-yawi ɣer wanda tekres ɣef umdan. Tikwal, yettellem-as ayen yettakken anzi ɣer tidet am tnelli, deg-s ad yeṭṭef umeɣri ma yebɣa, neɣ am tistent inettun deg wallaɣ n umeɣri, ahat ad inafeq ɣef tnumi n wussan-is.
Ɛerḍeɣ ad d-rreɣ cwiṭ seg uɣanib-agi… nniɣ-as ma ur d-yuwi, ad yessexreb cwiṭ nniyya n umeɣri…
(…)
Asnulfu n tmacahut. Taḥkayt. Ur tt-id-yettaru la ugrud la urgaz. Ur tt-id-yesnulfuy yiwen. D taḥkayt n ula yiwen. Tezmer ad teḍru di yal amkan, ur tesɛi yiwen kan n ubrid akken ad tebdu. Tbeddu s wawal : Rebbi. Ayen nniḍen ad d-yas iman-is :
Rebbi, d isem n yiwen yesɛan aṭas n yismawen. Qqaren-as : tasusmi, tafrara, ula-ḥedd, ajeǧǧig d yismawen wiyeḍ, d awezɣi ad ten-id-yini yiles akk, teɣzi tudert s timmad-is wissen ma ad d-tqidd akken ad ttwabedren akk yismawen nniḍen. Akken ur tettiɣzif temsalt, yennulfa-d yisem Rebbi, yennulfa-d akken ad d-imel akk ismawen wiyeḍ, d isem ara d-yemlen yiwen yellan di yal amkan, ala deg tmezgidwin, ala deg tɣiwanin d wayen akk yettaken anzi ɣer uxxam. Acku Rebbi yezga berra, di yal lweqt, akken yebɣu yella wass ; ula deg tegrest, yeggan deg udfel, yettuɣal-as udfel am leqṭen ; adfel, yettmuddu-as kan temlel, xelḍen deg-s d kra yitran. Teqseḥ n usemmiḍ, yettaǧǧa-tt udfel i yiman-is. Rebbi, ur yezdiɣ axxam ; ur t-yeḥwaǧ ara, yerna mi ara iwali axxam, yetteldi-as tiwwura, yettruẓu-as leḥyuḍ, yesruɣu-as ṭṭwiqan ; win iɛeddan, win yusan, yekcem yid-s s axxam : d ass, d iḍ, d azeggaɣ, d aberkan, yal taɣawsa, yerna akken i usan i keccmen, ur tettili tmezwirit, ur yettili uggani. Imir-nni, imir-nni kan, ttwaqbalen yixxamen, ttuɣalen zemren ad ten-zedɣen. Imir-nni kan, zemren ad ten-zedɣen acku ččuren : iṭij, aggur, tudert tahwawit, telqeq tageɛmirtt n tselbi, tizerqeq n tselbi. Syin akkin, Rebbi, yettbeddil amkan, yezga deg yiberdan. Seg wakken yezdeɣ iberdan, seg wakken yeggan anda yufa, deg tliwa d leɛwanṣer, gar yimɣan, deg leɛcuc n yigḍaḍ neɣ deg wallen n warrac imecṭaḥ, yettban-d Rebbi am win yettbeddilen tikli. Ma ur isebririḥ tiwwura, ur ixeddem acemma. Ahat d annect-a i d-ixeddim-ines : d tiɣimit. D axeddim iweɛren aṭas ; ulac aṭas i as-izemren, mačči menwala ad as-yezmir. Ma d netta, Rebbi, yessen-as. Tikwal, akken ad yesteɛfu, ixeddem kra : ixeddem timeqqunin ; igemmer tifawin akk n ddunit, igellu-d s tid n termag n yibanduyen, irennu-asent tid n tedwatin ; yis-sent yessalay timeqqunin, d acu kan ur yeẓri i wumi ara tent-yefk. Naɣ, tikwal nniḍen, yettarra ajeɣlal ɣef umezzuɣ-is, isell i uẓawan, isell i lmusiqat n ddunit akk. Mi ara asent-yettḥessis, yettili am tmeččimt n leqṭen deg wul-is, am ukeffa, aseggas-nni amenzu n lebḥer, temɣer n lebḥer deg wul-is ; Rebbi, imir-nni, tettaṭṭaf-it taḍsa ; Rebbi, imir-nni, yettarra-tt i yimeṭṭi ; acku, ɣer Rebbi, imeṭṭi d taḍsa msawan ; acku, Rebbi, yesleb akka cwiṭ, iga… amek akken. Win ara t-yesteqsin d acu i t-yuɣen, ad as-yini ur yeẓri ara, ad as-yini ulac i yeẓra, ad as-yini yettu kullec seg wasmi bdan yiberdan, ad as-yini iruḥ deg-sent, truḥ-as tili-s, ad as-yini yettu ula d isem-is. Syin akkin, cwiṭ akka ad ittaḍsa, cwiṭ akka ad ittettru ; ad yettruḥ ad yettuɣal ; d ass neɣ d iḍ, akka kan, yezga akka, yal ass.
(…)
Christian Bobin, Souveraineté du vide, Gallimard, 1995, pp. 39-41.
