Qqim d yiman-ik/im ; di sin kan, mi ara ak(am)-d-yettmeslay, ḥess-as d acu ara ak(am)-d-yini. Yezmer ad d-yesmekti, yezmer ad isirem, yezmer ad yezzem, yezmer ad d-icekker, yezmer ad ak(am)-yeslef, yezmer ad k(kem)-yexbec, atg. Qqim yid-s… di sin yid-wen kan, ad twaliḍ. Mi as-tḥesseḍ ad k(kem)-in-yuɣal wawal. Syin akkin, fru-tt d yiman-ik(im). D acu ara txedmeḍ…
I ma yenna-ak(am) : « sugen-d iman-ik/im d cwiṭ n tili… neɣ d iferr di ḥertaḍem… neɣ d tiqqit-nni i d-ifaḍen seg ubuqal… neɣ d tizwelt tanubit, tebɣa-tt tiṭ, yugi-tt ufus… neɣ d awal-nni yesfeḍ ufus n umaru, yerra fell-as ijdaren n usxerbubec… neɣ d tawriqt yessekmec ufus yerfan… ».
D acu ara txedmeḍ ?
I ma yenna-ak(am) : « lamer kečč/kem d iɣzer yeqquren… neɣ d tifdent tis 6… neɣ d tafelluct teṭṭef lwihna… neɣ d ugel ixussen deg useḍsu… neɣ d aṣurdi irexsen… ».
D acu ara txedmeḍ ?
Neɣ ad ak(am)-yini : « Lamer ad tuɣaleḍ timmist yeqqazen deg teksumt taleqqaqt… neɣ d tiderrit yekkaten deg tikli n uḍar… neɣ d tuɣmest iɣusan… neɣ d aḍad alemmas n ufus… neɣ maḍi d aslewlew n yir lfal…
… D acu ara txedmeḍ ?
Amek !!! Ur teẓriḍ ara !!! Acimi ihi i teqqareḍ : « aḥeq nekk » ?
Lamer d nekk ? Nekk, ad ak(am)-in-iniɣ. Nekk, ad aruɣ ɣef wayen akka i d-neqqar.
Nekk, ad aruɣ ɣef wayen ara xedmeɣ.
Muḥand Akli Salḥi
