Nezga nettzuxxu s uxxam aqdim n Leqbayel. Winna akken i d-ǧǧan lejdud-nneɣ i yimawlan-nneɣ. Winna akken neǧǧa nekkni i waḍu d uhtuti ; yuɣal d ixriben. Ass-a ttwalin-tt yimsebriden d tafelwit n leḥzen, ččuren-tt yijḍaren d yiblaḍen iggugmen ; deg-s kra n lɛedsat n ukermus d tenqelt teffeɣ seg sseqf-is, terra-d asalas ddaw-s ; ɣef tenqelt-nni, tuli tara n uzbeṛbuṛ. Wissen acimi i neǧǧa axxam-nni, axxam-nni aqdim, winna akken i wumi nsemma axxam n Leqbayel, d asgen i tɣerdmiwin d yizerman !!!
Nezga nettzuxxu s uxxam adqim n Leqbayel. Winna akken yesɛan addaynin d ugens d tkana d tesga d tewwurt n usɣar ur nettruẓu, d rrza n wuzzal aqesḥan neɣ n ufurek n zzan. Axxam-nni yeddukklen d wiyeḍ deg yiwet n lḥara, fergen-itt-id nnif d lḥerma. Wissen acuɣer i t-neǧǧa d d ilem ? D netta i iḍeyyqen neɣ d nekkni i imeqqren !!!
Nezga nettzuxxu s uxxam aqdim n Leqbayel. Asmi nekker ad nebnu, nekkni s wat wass-a, neddukkel am yiḍudan n ufus : ur nerri addaynin, ur as-nbeddel udem ; ur nsuli takana, ur as-nefki udem nniḍen ; nsuẓ leḥyuḍ armi rẓan tilisa n lewqam, nesseḍyeq lḥara akken deyyqen wulawen-nneɣ : nebḍa akal (nerna adrim) s umennuɣ gar watmaten, ma d tiysetmatin nefka-asent axxam-nni aqdim (ma yerẓa-tent-id lḥal). Wissen acuɣer ur nebni akken bennun wat zik, ur nebni akken ad nili d nekkni deg uxxam yettakken anzi ɣer win n lejdud !!!
Ma d tidet yelha uxxam-agi aqdim n Leqbayel, acimi ara t-neǧǧ ? Acimi ur t-nbennu ara ass-a ? Acimi ur nḥerrez ara udem-nni-ines aqdim ? Neɣ xersum ad as-nefk udem i nwala iwulem-it ass-a ?
Ma d tidet d tigejdit gar tgejda n tmagit-nneɣ, ulamek ad nestehzi deg-s, neɣ ala ? Acku ma ɣlint tgejdan n tmagit, d acu ara d-yeqqimen ? Iban-iyi, issefk fell-aneɣ ad as-nebnu udem amaynut ara isidren tamagit-agi akka ɣer sdat. Neɣ ur as-tezmir ara teqbaylit-nneɣ i wayen i d-iteddun ?
Ma yella ur yelhi ara (dayen yeǧǧa-t zzman), acimi (ara) nettzuxxu yis-s ihi ? Axxam aqdim d amedya kan… ggten yimedyaten wiyeḍ. Amek ara nili d nekkni, ass-a d uzekka, war aqejjem deg yiman-nneɣ d wiyeḍ, war amennuɣ d yiman-nneɣ d wiyeḍ ? Neɣ tamagit-nneɣ d tujmiwin kan ? D asḥissef kan ? D amennuɣ kan ?
Nniɣ-as yif-it ma nella d nekkni, ass-a d uzekka, yerna… di talwit.
Neɣ d acu i tennam(-t) ?
