Amek ara yili uwdeg (individu) d netta ma yella yekbel-it ugraw (groupe) ? Amek ara yili ugraw d netta ma yella iwedgan-is ɣunzan ayen i t-yesbedden d timetti yebḍan ɣef tmettiyin nniḍen ? Amek ara ilin di sin yid-sen d nutni ma yella wassaɣ gar-asen yebded ɣef uḥettem (agraw, yettḥettim ɣef uwdeg) ? Amek ara ilin di sin d nutni ma yella wassaɣ gar-asen ires ɣef umgired (awdeg, yettnamar timetti-s) ?
Asteqsi, deffir wayeḍ. Asteqsi, sdat wayeḍ. Asteqsi, d tama n wayeḍ. Asteqsi, deg wayeḍ. Asteqsi, seg wayeḍ. Tiririt ɣef usteqsi, d asteqsi. Tazwara n temsalt, d asteqsi ; taggara-s d asteqsi.
D acu ara tt-yefrun ? Amek ara tefru ? I kunwi/kunemti, d acu/amek ara txedmem(t) ? Ma d nekk, ad iniɣ ad xedmeɣ akka :
Di tazwara, ad εerḍen ad fehmeɣ d acu-t uwdeg, d acu-t ugraw, d acu-tt tmagit.
Tin yernan ɣer-s, yessefk ad gzuɣ amek i tettili tudert n umdan deg tmetti. Amedya : amek-iten wassaɣen n uwdeg d ugraw-ines ? D acu i yettalas uwdeg deg ugraw ? Deg wacu yettwalas uwdeg deg wassaɣen-is d ugraw ideg yettidir ?
Syin akkin ad waliɣ d acu-ten wassaɣen yellan/yettilin di tudert n ugraw gar netta d yigrawen nniḍen (ittusemma diɣen gar yiwedgan-is d wiyeḍ) ama deg tallit tamirant ama deg umezruy.
Ad iniɣ ma sawḍeɣ friɣ tlata n tneqqiḍin-agi, ad gzuɣ tamsalt-agi n tmagit n uwdeg deg ugraw-is. Xersum cwiṭ deg-s, ɣas isteqsiyen ala nutni..
I kečč/kem, d acu tenniḍ ?
Moḥend Akli Salḥi
