Tizlit A yemma ɛzizen ur ttru, ɛelmen akk medden yecna-tt Farid Ɛli. Drus medden i iɛelmen, lmuziga-ines ixdem-tt Mustapha Sahnoune ; ma d win i xedmen imeslayen n tezlit,  tikti anisi id-tekka, ur yeṭṭuqet ara, neɣ, ulac awal fell-as.

Tizlit-a tettwasekles deg ṛadyu n  Tunes. FLN yesεa, gar useggas 1958 d useggas 1962, tarbaεt n ccna, ittunek-as umkan deg radyu n Tunes ; suffɣen-d yiwet tedwilt semman-as « SAWT ALDJAZAIR » . Gar inazuren ittekkan deg terbaεt-a, yella Farid Ali.
Tamacahut n tezlit-a : Abdelkrim Bouamama yemlal Taher Ait Aldjet deg yiwet temlilit ɣef tegrawla, din i as-d-yemla amek id-ilul yizli n tegrawla «  A yemma εzien ur ttru ». Tanaga-ayi yura Abdelkrim Bouamama deg udlis-is ɣef It Yaεla, iεawed yemmeslay-d fell-as  Mohamed Ou Slimane Bedjoudjou. Ata d acu id-yenna:
“Myagren, deg useggas 1957, imjahden n tlata lwilayat deg yiwen umkan qqaren-as “Muqa” deg idurar szat n It Ɛebbas: Lwilaya tamezwarut ɣef uqerruy-is Hadj Lekhder, tis tlata ɣef uqerruy-is Amirouche, Lwilaya tis rebεa ɣef uqerruy-is Si El Houes, din I lliɣ szat n Amirouche. Amirouche iεreṭ ameddakel-nni ines I yessen asmi yella deg Fransa: Rabie Bouchama (amedyaz) ; din I as-yeṭleb ad yexdem izli s teqbaylit i yimjahden ad t-cennun deg yidurar. Din I yebda tira n usefru:
A yemma ssbeṛ ur ttru
Ma d ttaṛ ad am tt-id-rreɣ”.
Mustapha Sahnoune, deg La Depêche de Kabylien wass 01.11.2007, yenna :
“Yiwen wass irza-d ɣur-i Farid Ali, yusa-d ad iyi-d-yini ma yella ccna aqbayli texṭa-t tegrawla, nekk nniɣ-as belli izzayriyen merra ttayalen ad cnun ɣef tlelli n tmurt ; d acu kan, ilaq-iyi asefru akken ad zemreɣ ad as-xedmeɣ lmuziga. Nemsefraq deg tlemmast n yiṭ, ɣef 06h n ssbeḥ yuwi-iyi-d asefru, isemm-as A yemma εzizen. Asefru-nni ibeddel cwiṭ seg-s, iseggem-it Mohamed Bouzidi. »

El Hadi BELLA

Iɣbula:
1-Dépêche de Kabylie 01 novembre 2007
2- ربيع بوشامة، بني يعلى تاريخ و أمجاد
3- محمد اوسليمان بجوجو، تاريخ شمال سطيف من العصور القديمة الى نهاية الثورة التحريرية