Ugar n sin ledwaṛ i d-isaḥen i Tebboune Abdelmadjid, Aouchiche  Youcef akked  Abdelaali Hasani Cherif akken ad ten-fernen izzayriyen d tzayriyin, ad ten-rren ɣef uqerru n tegduda. Wisen dɣa ma s tidet yumen ugensas(représentant) n FFS akked win MSP belli ad awḍen. Tagi, akken s-yenna umedyaz, d taqsiṭ nniḍen, ur tecɣib ara amagrad-a.

Di tlata yid-sen, yal yiwen yewwet amek ara yesseqneɛ agdud ad yebuṭṭi s lqewwa, rnu fell-as. Ttawil isxedmen i wakken ad « awḍen »  iswi-nnsen d « awal » akked tugna, ladɣa awal.
Deg usatel n taywalt (contexte de communication) yecban tifranin, yal amazwar (candidat) yettextiṛi tasetratijid i iwala ad tessiweḍ. Tastratijid-a tcuba tin n udellel yekkaten ad tzenz « isufar » (produit) ». Ɣef waya tettwafren testratijit-a yessexdamen tutlayt  i igezzu wegdud. Amedya : mara nleḥḥu di temdini, nettemlilim-d tugniwin n kra isufar n wučči neɣ tissit. Kra n tugniwin n udellel n lgazuz jebbdent lewhi. Yiwet teqqar « Gerreɛ, qelleɛ ! », tayeḍ « selecto, mɛak partout », tayeḍ daɣen « ma ɛendek ma tqul ». Win yextaren tutlayt-a ḥsan belli d tin i yettmeslay, d i ifehem wegdud. Drus ara ifehmen (ɣas ma yefhem ur tnebbec ara) : « laysa ladayka ma taqul », « selecto maɛaka fi ayi makan kunta fih »…
Widen yextaren tutlat-a ur d asen-d-tuqiɛ ara si temsal n tidyulujit. Aɣbel-nnsen d amek ara d-skecmen adrim i tkubbanit. Axtiri  n tutlayt i cud ɣer lfayda ara d-tawi. Akka ula d tutlayt n lḥemla n lbuṭ.  Ɣas ulamma, ttaqa deg isertayen sluɣen annar asnilsan (réalité linguistique) s tdimagujit n lluɣatu lɛarabiya lfusḥa, mi d-ḥeḍrent tefranin ttmeslayen s tutlayin n wegdud.
Akken ara ten-yaf lḥal deg iberdan, di leqhawi, di ssuq ad d-ilal  « wac rakum ? » deg umkan « kayfa ḥalukum ? » ; « Azul fell-awen ! (ma yella d tmurt n leqbayel i ten-tuɣ)» deg umakan n « salamu ɛalaykum wa raḥmatu lah taɛala wa barakatuhu »… Rnu  widak-nni yesexdamen « azul unṣib » urǧin d asen-tella tmaziɣt deg ul. Meɛna, imi tenfeɛ asenduq n lbuṭ, wicqa.
Akken kan ara beddlen asatel n taywalt, ladɣa mara sen-meknen imikruten n tv, ad yebdu : « inna ma yedulu ɛala cayin, yadullu ɛala. Wa bi ttali, neḥnu fi ḥezbina n urekkiz ɛla wiḥdatu  lwaṭiyan al muweḥadda…. », ad as-tiniḍ ad ttmeslayen i wegdud n mecreq lɛarabi.
Ɣas ulamma tamaziɣt d tutlayt tuniṣibt, yewwi-tt-id kan umeddaḥ d lewhi kan,  deg « wazul unṣib », mara yemlil umazwar akked leqbayel.  Amazwar n FFS iɛedda akkin i « azul » : yettmeslay tamaziɣt. Ula d netta kifkif, mara s-meknen amikru itterriḥas-d i tmaziɣt-nni tagugam i icuban lɛrabiya lfusḥa, gar wayen yenna : « tamurt-nneɣ tebna ɣef tlata n trekkizin : tineslemt, taɛrabt akked tmaziɣt ».

A wi yufan yal ass d tifranin : akka meqqar isertayen ad mmeslayen tutlayin-nnsen.

Tahar Ould Amar