Ƹmeṛ Mezdad d mmis n tmurt, d ameγnas alsan ameγradan. D amsejjay n lḥirfa, d amedyaz, d aneggal n teqbaylit s teqbaylit, n tmaziγt s tmaziγt ur nḥebbes di tira…am umeddaḥ-nni ur nḥebbes di tikli. Bexlaf tamedyezt-is tameγnasant di talliwin-nni n tebrek d ddel n iseggasen n 60 d asawen n Lezzayer tilellit armi d yebrir n 1980 γer da, Mezdad yeldi-yaγ tawwurt γer tsekla tatrart, γer wungal amezrayan, ladγa γer tilawt ddmen tirga d uneγlan.
Yella deg yinzi : «Akken ibγu yekka yiḍ, leqrar-is ad yali wass». Deg ungal-is amezwaru Iḍ d wass (1990), Mezdad yessarem aya, yessenfali-t yura-t, yessufeγ-it-id deg tegnawt n tirga γer tigawt. Ayen ur yezmir umezruy, tessawal-it tsekla. Akin i waya, ameskar d win yeγγazen daγen deg tesnawalt: D win yettaččaṛen ikufiyen-nneγ s umawal d tmawalt; d bab n umeslay yessawalen i ″ Ugarmeslay (Dialogisme) neγ dγa akin i usuget deg talγiwin-ines tiseklanin -iwudam yerran allen d wallaγen d igran d igenwan- ladγa tapulifunit-is (polyphonie).
Aneggal yura yettaru; ṛuḥ terzuḍ γer yizri, seg temnekcemt n ddel n yIṭeṛkiyen di 1515 almi d tamhersa tafṛansist n 1830, zger-d γer da γer 1980 d asawen. Γas Tettḍilli-d ur d-tkeččem, ad d-yas wass anda ara d-tekcem war ma teṭṭal-d…
Tira taseklant d tira yessufuγen seg txenfuct-is ayen ur yezmir ad d-yini yimi d wayen tettel tuttla iles yettlen…lḥaṣun, ula ara d-rnuγ γef yitri aseklan n Dda Σmeṛ, ad t-rreγ kan d tagrayt-iw, ad t-ssenfaliγ d asefru:
Akal ma yeffeγ-it wawal
Ur s-ngi azal,|
Am sekkil yeğğan tira-s
Iḍ d wass i nettṛaju
Am wass-a ad d-tejbu
Tettḍilli-d ur d-tkeččem
Skud llan yineggalen
ara γ-d-islalen…
Tal tallit ad d-taf tilla-s
Moh Laid Deflaoui
