Init-iyi-d…
Acimi aqraḥ n unegmar-nni n Kuba di Le vieil homme et la mer n Ernest Hemingway ttwalin-t d amedya n tneggas n umdan yettnadin ɣef lebɣi-s, ma d aqraḥ n Cabḥa Nat Banen di Tamacahut taneggarut n Linda Kudac nettwali-t d asmeṭṭew n tmeṭṭut di lḥara n wadda ?

Init-iyi-d, di leɛnaya-nwen…
Acimi Leon l’Africain n Amin Maluf ttwalin-t d ungal amazray ideg tidyanin n umezruy imsel-itent umaru akken i tent-iwala netta wulment i wat wass-a, ma d Tullianum. Taggara n Yugurten n Ɛumer Ulamara nettwali-t d azeṭṭa ideg tugar tmeɣnest tidet n umezruy ?
Init-iyi-d, ma ulac aɣilif…
Acimi tizlatin-nni n Brassens ttwalin-tent d isefra izeggren akkin i tlisa n tmedyezt, ma d iḍrisen-nni n Meẓyan Kezzar nettawli-ten d tuɣac kan, lhant akka cwiṭ mi ara tent-yecnu Zimu, am seksu n xalti Malḥa ?
Init-iyi-d, ma testufam…
Acimi wiyeḍ ttwalin ayen yeffren gar wawalen deg tsekla-nsen, ma d nekkni netteffer ayen nettwali deg tsekla-nneɣ ?
Init-iyi-d, ma teẓram…
(Ma d kunwi ittezmumugen s uɛekki, ulaɣer ad d-tinim, sliɣ-awen-in yakan).

Muḥand Akli Salḥi