Aγbel, d awudem-iw yeddem-it
I d iyi-yeğğan di tfekka-w
Tettaweγ ufiγ-t d amdakkel
Nezga nekk yid-s d azγan
Yettgursul wul, itezzi-d
Nettemyaf, d amhaz-nneγ
Tudert-iw d iwudam-iw
Ur εad dγa myussanen
Mlalen myuzzamen;
D amek-itt akka tuzzma-nsen?
Ẓriγ aṭas i tεebbam!
Mi teddrem tedder tira-w
Mačči d tillas i d tilas
Γas tejjex thuski-inu:
Tugdi tessumet tidmi,
Ul n tebγest d tigzi
Ad as-nṛuḥ s ttawil
I tmettant i d-yettlalen…
Tirawt-iw texmet tedreg
Ul yekmen, iles yedkem;
Tuffγa tesluγ asif-iw,
Igezmen idurar-iw
Akkin i jellu n talsa
Ad d-gruγ d uwudem-inu…
D tilla-w i d amezruy
D cwiṭ n kra i d tuget
D tili-w i d iṭij-iw,
Γas akken ur d-icriq ara
Inig yuγalen d leslak
Yettṛaju tuγalin-is
Awal yeffγen akal-is
Am yitran war tiziri
Akal ur nessin awal,
Ad yeddem azal d abandu…
Skud aẓar ireṣṣa
Ifer aεeqqa d ṣṣaba-s
D akud kan i nesserwat
Lemmer yufa-t wennar-is
Win yessnen amaḍal-a
Iṛuḥ yeğğa-d tiggujelt
Iziγer yuγ asmekti
Ziγ tasekla d asefru…
Moh Laid Deflaoui
