Tamedyezt tuγ aẓar d ameqqran di tmeddurt-nneγ, tezga d amnay d inigi n umezruy n tγerma-nneγ. Mačči d yiwen n umsehres i d-ikecmen γer wakal n tmazγa, γer wakal n tmurt, deg wakken tutlayt-nneγ teṭṭef deg lxiḍ n ṛṛuḥ ur tengir ara. Acḥal yezrin d leqrun, nettat d timawt: Ccwi teẓẓuγer-itt tmedyezt almi d ass-a ideg tuγal d tutlayt tunṣibt deg wul, d tutlayt n tussniwin, d tira tutlayant neγ d tutlayt n tira is nettaru akka tura γas akken uqan fell-as wuguren.
Asekkil imaw d awal yeddan seg wakud γer wayeḍ, seg tsuta γer tayeḍ; d awal amedyazan aseklan i γ-imenεen seg nnger utlayan, i γ-d-yerran γer wennar asnislan n tmurt. Akka! Anda akken nebγu nili, tamedyezt tezga yid-nneγ, tili tedda d yitij-is. Inig, ur neẓri d acu-t? Yesserwal yesseḥbibir, ireggel umdan yettḥebbiṛ, yeqqim izdeγ-it lḥir; si lbeεd issumut nnhati, di tmurt ittbeddil urfan.
U dγa:
Uğweγ-d nnhati s wurfan
D aεraq i yi-iεreq leḥsab
Allaγ ul ur sgunfan
Terqes tiṭ abrid irab
D urfan s nnhati i yi-iğğan
Taswiεt, ass-a tenneqlab.
Anda nṛuḥ tedda yid-nneγ, γas ma nṛuḥ ad nettu, tettarra-d abeḥri γer tnila-nneγ. Tamedyezt-nneγ tuklal leqḍer; d azamul-nneγ, d tudert-nneγ meskud tesğuğğug tutlayt-nneγ. Ula di Marikan Ugafa, tettarra-yaγ tagrest qessiḥen d anebdu n tmurt: Tekcem s aγerbaz, tuγal d ahil d asenfaṛ n uselmed i warraw-nneγ iminigen.
Ahat nefṛurex s wid ijebbden imru n tmedyezt di tmura-ya n wedfel yeqquren. Ulamma nbeddel adeg nunag, awal i d-yeğğa wawal newwi-t yid-neγ d aεwin, d asmekti n taddart, d leεnaya n tmurt. Гas akken ur γ-ğğin ad nelmed tutlayt-nneγ dihin, nelmed-itt akken nniḍen, nelmed-itt s wudem alemdiman, nesselmed-itt anda nniḍen.
Asmi nekcem di tγuri n uneγlan aseklan yessefrawasen ″Bururu″, ul yewwi-yaγ-d anezgum d amezgun n ″Timlilit n tγermiwin″. Mi d-rnan dγa yidlisen-ungalen nniḍen ur γ-d-newwiḍ γas neγra kra n yigzulen γef tirawin-nsen, ladγa amecwaṛ, si zik ar ass-a, i d-telḥa tsekla-nneγ ″Taqbaylit, iles d yidles″ neγ aserwes aseklan akkin i tafat d tillas ″Tiṭ d yilleḍ″ ; lḥu ternuḍ ay akud γer tğenniwt-nneγ yessaramen, yessaram bab n ″Tawkilt tamcumt″. Awer tens fell-aγ teftilt n tira-nneγ ay ineggalen, ay imedyazen!
S lγiḍ d lḥir d layas i nessuli ccan-is, nesassen-itt di tal tama di ddunit. Nessekfel-d aman n waẓar-is, nger-itt di tal taγult yeddan d waḍu ussnan. Asekkil d aγewwaγ, iteddu war tilisa, ur yedderγel yessawal, d tasrit neγ d asefru, yessilqiq-it usirem γas tewser telḥa tejba. Ah lemmer amezruy d ayen i d-iteddun!
Гas fell-aγ teqseḥ tegrest
Tesduri-yaγ temlilit
Гer γuṛ-s i nettaf tabγest
Nettleqqim deg temsislit
S axxam, lewhi d tasnilest
Γer wul n udlis d tasnaslit
Ma nunag akkin i tidmi n tutlayt-nneγ -γas tuẓa γer zdat deg tussniwin-a titrarin- ad d-naf amzun akken txuṣ tiṭ n wul n wallaγ ara γ-yawin γer tegnawin tisnagrayin-tifelsafin…d tutlayt-a-nneγ -yellan deg semmus n tutlayin timezwura n talsa- i s-yefkan iles i wales…
_______
Amawal/Lexique :
Timsislit: Phonétique
Tasnilest : Linguistique
Tasnaslit: Phonologie
Moh Laid Deflaoui
