Wis acimi, ddurt-a, Amkan n wis d acu-t yexla. Azal n krad n tsaɛtin nekk tezziɣ, tenḍeɣ dina, ur iyi-d-iban ula d yiwen. Dɣa, friɣ-tt di ṛṛay-iw : ad uɣaleɣ s ansi d-kkiɣ. Akken kan kkreɣ ad zziɣ s weɛrur i umkan n wis d acu-t, ḍehṛen-iyi-d n mmeya gar tlawin akked irgazen zzin d agraw i yiwen neɣ i yiwet. Qerbeɣ. Ɛeqleɣ win i wumi zzin d agraw. Yemmuqel-iyi-d, yecmumeḥ, yenna : « Eǧǧet-as abrid ad d-ɛeddi ! ». Nekk, ggugmeɣ, awal ur iyi d-yuli ara. Ur uminent ara wallen-iw. Acḥal aya seg wasmi d-ttruḥuɣ ɣer umkan-a n wis d acu-t, werǧin temlaleɣ. Iwehayi-d s ufus-is, ad qerbeɣ :
– Bonos Tangalt ! Qerreb-d.
– Azul a… dda Lwennas !
– Azul a Tangalt. Amek akka telliḍ, amek tella Tmurt ? I tmaziɣt-nni ?
– Euuh…
– Zṛiɣ. Mazal-itt kan akken : mi ɣ-tekkes tuqqsa usemmiḍ, tayeḍ ad tt-id-nesnulfu. Yegguma a ɣ-yeffeɣ yiṣṣiḍ, nefhem i zdeɣ-aɣ waḍu.
– Yella wayen yessefraḥen a dda Lwennas. Dɣa mačči akka i berriket tegnit. Nɛedda akkin i uḥulfa n tmeqwa .
– Ih, ẓriɣ d acu ara yi-d-tiniḍ : tamaziɣt d tunṣibt d taɣelnawt, teffeɣ lalkul, tekcem lakul, tesɛa amkan di APS, tesɛa rradyu d tilibizyu, tesɛa lkumiṣar… tesɛa ula d ungalen.
– D tidet, yella meṛṛa waya.
– Ayen yugaren aya, ulac-it.
– D acu-t akka wayen i iɣelben Tamaziɣt ?
– D tilelliiii !
– Neɣ d keč i d as-yeqqaren, ma ulac Tamaziɣt, ulac, ulac. Yettusemma d nettat i ten-iɣelben meṛṛa.
– Asmi akken i d as-nniɣ akka, yuɣ lḥal nbegges-d i tugdut, nuɣ-d abrid n tlelli. Ass-a, akken twalaḍ, nefka afus, nserreḥ-as i ṭbel deg waman. Nelha-d d ijeqḍuren ur nemɛin. Ula d zhir-nni i kukraɣ, yenfufed, yelḥa di tuddar, rnu d tamaziɣt-nni i t-yessawalen. Ahbuh !
– Dɣa mačči anect-a meṛṛa i texnez teswiɛt. Lukan ad tezreḍ acḥaln yidlisen d-tefɣen s tmaziɣt taggara-a…
– Ẓriɣ, ulac ayen i yefren deg umakan-a n wis d acu-t. Zriɣ llan aṭas n yidlisen. Llan ula d widen yefkan azuɣer i yičamraren, rnu s teqbaylit.
– …
– Tidet kan a tucbiḥt, fkiɣ-tt i ubdir Tmaziɣt ara d-yeslalen abu hurayra s teqbaylit, ara yekksen i teqbaylit timeḥremt uḥelles ad tt-ibeddel s ujelbab. Fkiɣ-tt i ubdir tmaziɣt ara imeḍlen tilelliyin, taẓri, cbaḥa… Tamaziɣt-nni yif-tt ulac.
– Amek ihi ?
– Akka ara teqqim temekemk, skud ur nemyeɛqal ara, skud , surtout, ur neẓri ara d acu nebɣa.
– …
– Tbanḍ-iyi-d teɣubneḍ. Aha kan d tamsalt n lweqtkan : ad d-yuɣal wemkan s amkan-is. Aha tura, ini-yi-d amek llant tuddar-nneɣ.
– Kulec teẓrid-t deg umakan-a n wis d acu-t. Ini-iyi-d keč d acu itejmeḍ di Tmurt.
– (yessusem acemma) Jmeɣ… Nadia. Jmeɣ daɣen azṛu n leɣrib. Jmeɣ tafexsist ara d-yettwaksen tafejrit. Jmeɣ at taddart-iw. (yuɣa lyessusem). Dagi, ttemwanaseɣ d leḥbab, widen akk ḥemleɣ : Djami, yemma, baba… Alih a Tangalt, ɣur-i ttiɛad nek d Hamid, ruḥ di lehna. Ssiweḍ slam-iw i yimesdurar n twaɣit. Ini-asen a massa ad ifak Rebbi lḥif.
Tahar Ould Amar