Llan wawalen, mi ten-yemsel wallaɣ, ttuɣalen am tuffalt ijebbren taruẓi. Llan wawalen, ugaren tigawin, mi ten-yeɛrek wallaɣ, sefḍen tuggdiwin akken i senṭaqen asirem deg yimi n uzekka. Neɣ ɣas ini-d gan am tṛabuzt yettleqqimen tirgin d ijujaḥ. Wigi d awalen igrawliwen. D awalen n tegrawla. Am cwiṭ-agi n uḍris :
» Beṛṛa, s kra yekka yiḍ, yekkat ugeffur. Anemḍer n tafukt, akken d-yeslul tuggdiwin-nneɣ i yesnulfa tirga-nneɣ.
Deg uxxam, taɣect-nni yebḥebḥen, tin akken n tyematin n tiyematin-nneɣ, d yiwet-is ɣas zrin fell-as leqrun ; tezga tesnulfuy-d akken izuzzun umaḍal anmakun (monde merveilleux) lejdud-nneɣ seg wasmi tebda talsa.
Akud, yennerfad ; ccna, yessefsay tuggdi, yesnulfuy-d tagmat gar yimdanen ɣer tama n lɛafya ; anya (rythme) d yiwen-is, izeṭṭ talaba i tfekkiwin-nneɣ, yerna-asen asugen i wulawen-nneɣ.
Akka seg zik n zik, ɣas uḍan, mi zerrin, zemren ad glun s wanyaten (rythmes) ineggura.
Wissen uḍan-nni d wanyaten-nni ma ad aɣ-d-ǧǧen d igujilen ? Tajmilt-is d tameqqrant i wagi i asent-yefkan i yifyar iqburen tudert tamaynut ; yedhen-iten s wantayen atraren yerna ur asen-yekkis acemma seg sser-nsen anaṣli. Ifyar-nni, yesseɣzef-asen tudert ; nekkni, mazal-aɣ nḥemmel-iten.
Yehwa-as kan i udfel yettkemmil yekkat di beṛṛa« .
Aḍris-agi, mačči inu. D Lmulud At Mεemmer i t-yuran. D awal imsenked (présenrateur) i d-yeddan deg uḍebsi Baba-inu ba (1973). D aḍris agrawliw (n Lmulud At Mεemmer) ɣef usefru agrawliw (n Ben Muḥemmed) i yerra Yidir d tizlit tagrawliwt, tecna-tt taɣect fessugen. D tizlit yessemlalen telqey n yiẓuran d ubrireḥ n tiṭ yettnadin.
Akka : mi ara ttwaεerken wawalen s yifassen zeddigen, sfilliten i tgella n tegrawla. Neɣ d acu tenniḍ ?
Muḥend Akli Salḥi
