Ass n lǧemεa, deg lxeṭba n tẓllit n lǧamuεa, ccix n lǧameε yuwi-d awal deg lxeṭba-ines ɣef yir tadukli ; “tdukli deg tikurṭa”. Yeḥka-d yiwet teqsiṭ, yenna:
«Llan tlata iterrasen dukklen ad akren agerruj n yiwen urgaz. Iwakken ad tettwiffer taluft, msefhamen ad t-nɣen. Nɣan argaz-nni, ukren agerruj-is, εebban-t ɣef uɣyul-is.
Deg ubrid, mi qqimen ad sgunfun, yiwen seg-sen, amezwaru, iṭer ɣer yiɣzer ad ireẓ aman n tasa. Wis sin yenna-as i wis tlata: «Yya-d ad t-neneɣ, ayen id-nuker ad t-nebṭu nekk did-k…»
Iεjeb-as rray i wis tlata.
Nɣan-t, meṭlen-t, kemmlen abrid.
Tteddun, wis sin-nni yettxemmim weḥd-s weḥd-s, yeqqar-as deg wul-is: «Ad t-nɣeɣ, ad awiɣ kullec weḥd-i!»
D ayen i ixemmem i ixdem ; yenɣa-t, yeqqim-d ugerruj i netta ; kullec yuwi-t weḥd-s.
Agerruj ɣef uɣyul, yerna yerkeb netta. Yedda.
Iεedda ɣef yiwen umkan, yuεer ubrid din, d lkaf. Yecceṭ uɣyul, yenquqqel urgaz-nni yeɣli deg yiɣzer yemmut..
Yesgra awal ccix-nni, yenna: «Win yeɣzan tasraft i wayeṭ, ad yemger deg-s netta».
Tfuk lxeṭba, deffir tẓallit, iruḥ yiwen ɣer ccix-nni, yenna-as: «A neεma ccix, bɣiɣ ad k-seqsiɣ… deg teqsiṭ i d-teḥkiṭ sgelli, irgazen-nni mmuten i tlata… ini-iyi-d ma d aɣyul-nni i ak-d-yeḥkan?…»
