Tasekla d tilawt[1] n uneγlan[2] neγ d aneγlan n tilawt. Ma nettγewwiγ[3] γef tsekla, γef teqbaylit i nesnuzgum, γef talsa i nettḥebbiṛ; ṣṣaba n yimγi d aman n waẓar-is, lγella n yimru d tirawt[4] n tira s tutlayt-is. D tiṭ yettwalin ul yettḥussun s wawal n wakal yegguni wayyur n tmurt. Ur d aγbel -suref-aγ ay udem alsan- mi terra tegmat timdukkelt d tagmat. D ul d allaγ teddem tfekka i γ-d-yesmektayen asekkil nerra di teγmert. Ah lemmer nessenfalay yes-s!
Tikkwal akka mi ara ssemyagreγ kra n yiwudam-nni-inu imawen n zik -yellan d imdukkal, d at wul- qqareγ: Ulac wi γ-yecban skud necqa-d nettaru s tira-nneγ ayen i γ-yessengugayen, ayen i γ-iceγben i ḥṣiγ d akken tasekla-nneγ taqburt timawt tedda tuẓa s annar n tira d tirawt. Mačči γef ddunit-a tamaḍlant[5] iγef d-ttmeslayeγ, maca γef taddart-nni tameγradant[6] anda i ferrseγ cerweγ tizemrin n wakal aḥṛur. Ccwi kan tasγunt Tangalt tella-d d afud i uneggal yuγen asekkil d ungal-is mi dγa zgant ttemyagarent tidi d tili i γ-d-iḥawec umezway n usirem.
Tussniwin n tmedyezt d tsekla uγent aẓar d aẓar di tmurt-nneγ. D akud ireglen, i nessergel nessegrareb i tent-yessettwaγen; menwala yuγal d asegbar n yiṭij semmḍen (acteur folklorique) di tiram-a yesḥizgilen anda i d-negra. Ay aqerruy ay aḍar; ay ul, allaγ-ik af-it!
Axemmem aseklan-afelsafan yeffeγ akin i yidurar d yisafen, akin yillelen d yigenwan, akin i useklu d uγerṣiw, akin i yimdanen d yiṛebbiten, akin asmi ara ad yejlu yiṭij n taggara n ddunit…ar naru s teqbaylit, s tmaziγt! Tasekla-nneγ taḥeqqanit d aman, d iṭij-a, d asteqsi, d aciweṛ, d azγan aseklan[7] …
Moh Laid Deflaoui
[1] Réalité. [2] Fiction. [3] γewweγ: Se rebeller, Aγewwaγ: Rebelle. [4] Écrit. [5] Mondiale. [6] Universelle [7] Critique littéraire.
