Awal yelhan d ameslay lεali. Nejguggel deg-s, acku nufa-t yufa-γaγ. Awi-d kan ma yezmer ad aγ-yessemyiger usekkil amsaddar aseklan n tafat n yidmaren i γ-yezdin! La ttaruγ smedyizeγ γef yiwet n taddart yeffγen akk igenwan-a i γ-yessnen ur nessin almi d-ufiγ ḥṣiγ d akken taddart-a-nni ssneγ-tt; ziγ d taddart-nni-inu, d axxam-nni-inu s teεrict-is, s tekwatin-is d lekḍar-ines, s udaynin-ines, s ṭṭeṛḥa-ines yessufuγen tiṭ γer yiγeẓran yettcercuṛen, γer tliwa n umazzer.
Mačči d ineḍruyen imaḍlanen neγ d timucuha timezrayanin mucaεen i d tasekla tameqqrant: D ayen tessufuγ txenfuct n yimru n wallaγ -xerṣum d taqṣiṭ tudrigt- γer wayen ara iẓerr uderγal, ara isell uεeẓẓug d wayen ara yaf d lebγi uẓawali. Tasekla d tudert-nniḍen yellan deg wul n yal amdan yessaramen nnig n tudert i ttwaḥettmen fell-as…yettarra-yas-d kan, yeslusuy-as, uneggal, ṣṣwab d thuski.
Anda yebγu yegmu uğeğğig n tegmat, timdukkelt tezga γer tayet-is; anda ira yunag yiwen skud ila deg wul n lxaṭer-is tigemmi yeddmen tidmi-s, d lγella. Aṭas i riγ ad d-iniγ, tiktiwin cuddent-iyi, yemγuγed yettemγuγud deg-i wemyag aseklan anagan yessiwzilen tehrew n tuγalin n yiminig: Ad asent-nessiwel kan i tidmi d tgemmi!
Tidmi: Pensée
Tigemmi: Patrimoine
Moh Laid Deflaoui
