D aseggas amaynut. Nessaram-it d amerbuḥ, d aseεdi, d ameggaz. Nettazen-asen i wid d tid nḥemmel, s wawal icebḥen, ayen (zeεma) i asen-nessaram. Nettaru di FB iznan n talwit, n tdawsa, n tayri, n tdukli, n leḥnana, n tegmat d wayen akk yelhan di ddunit. D acu kan, nzegger seg useggas aqdim ɣer useggas amaynut war asteqsi ; ur nesteqsay iman-nneɣ ma yessefk ad nbeddel tikli, ma mačči d nekkni i d ssebba n twaɣit-nneɣ, ma ur nḍur iman-nneɣ neɣ/d wiyeḍ, ur nettmuqqul iman-nneɣ deg lemri n yiman-nneɣ, ur as-neqqar « ahat », ur as-neqqar « amer ».
D aseggas amaynut. Win yekfan, dayen nettu-t yakan. Win i d-iteddun amzun ur yesεi assaɣ d win yekfan. Gar-asen, nga tiqenṭert ideg nseffeḍ ayen nebɣa ad t-nesfeḍ. Amzun ur t-nexdim. Γas yettwaxdem, ɣas nexdem-it, nseffeḍ-it s umenni i nettnemmi ayen yelhan deg/seg useggas amaynut.
Nniɣ-as ahat yif-it lamer ad ibeddel iman-is umdan s ubeddel n useggas. Nniɣ-as ahat ad yelhu useggas amaynut ma yelha umdan d yimdanen wiyeḍ. Nniɣ-as ahat ad yifsus useggas ajdid ma isirqiq umdan zzerb-is, ma yella iḥemmel i wiyeḍ ayen iḥemmel i yiman-is, ma iḥemmel wiyeḍ akken i iḥemmel iman-is, ma yella ur yerri iman-is d timiḍt n ddunit, ma yuwi kan amur-is, ma iga amur i wayeḍ. Nniɣ-as ahat akka ad yelhu useggas amaynut. Neɣ d acu i tenniḍ?
Muḥend Akli Salḥi
