Yekker-d wungif seg targit ur nessefraḥ. Iselsa-s ur yeẓri amek i ten-yesla: afus ikerres isebbaḍen, afus iqeffel tiqeffalin n tkebbuṭ… Akud yezwar-s. Lqehwa, yenna i yemma-s ad as-d-tesmir ayefki deg leɛḍil ad yessired udem-is. Yeffeɣ-d akken iteffeẓ. Akken yebɣu iɛeṭṭel, werǧin yufa-d lkar tezwar-as-d; dima d netta i yettraǧun…
L’arrêt yufa-t yekkemkem s lɣaci: imɣaren, irgazen, timɣarin, tulawin s tadist, igerdan s ubibru, inelmaden, iselmaden, … Ma d ameslay, awi-d win ara yeslen, zun d astudyu n tiliẓri, kra yeḍran; ama deg tmurt neɣ berra, neɣ sdaxel n yixxamen n taddart, ad as-tesleḍ: lbaṭaṭa terna, ayefki ixuss, iselmaden rnan-asen deg yidrimen a mḥaynek, Ccinwa tesnulfa-d avirus d amaynu, Marika terɣa, Yennayer d leḥram, tukkerḍa d leḥlal… War ma nettu asentel-nni i d-ttaɛwaden yal tanezzyt: “Lkar-a yessufeɣ-d ulawen-nneɣ, werǧin yuweḍ-d deg lawan!”
Hatan yuweḍ-d win i d-yessufɣen ulawen n lɣaci. Tura ameslay yeḥbes. Akken ma llan ttheyyin iman-nsen ad hejmen, ad d-ḥanin amkan. Ula d agrud-nni ɣef tcariṭ i yellan yettru, tura yessusem; yennum tagnit-a ulac win ara as-d-yeslen, ttru neɣ qim, yezwar ukersi di lkar… akersi n lkar yesɛa azal ugar n ukersi n lberlaman. Wama imɣaren, qqlen d ilemẓiyen: tazmert n yilef!
Akken kan i d-yeggari, yeṭṭer-d urusuvur… teṭṭerḍeq, tebbeɛzeq teswiɛt… am tweḍfin yettazzalen s abruj-nsen mi ara d-teɣli lgerra fell-asen. Ungif yeṭṭalay ansa ara iger iḍarren-is, yeṭṭal akka ulac, yeṭṭal akkin… ah, yeẓra-d yiwen yilemẓi igra afus-is ar lǧib n yiwet n tmeṭṭut… yekker ad d d-yini kra, idemmer-it-d yiwen ar deffir: “ḥerrek iman-ik, ɛni tenwiḍ da ara neqqim”.
Ǧamal n At Brahem, aṭeggal n urusuvur, yettaḍsa, netta amkan-is ar sdat, yettwaḥrez qbel ad tqelleɛ lkar. Yeṭṭal ar lɣaci, yeqqar i unehhar “uhmeɣ deg lɣaci-a i idemmiren ɣef wudem n ssbeḥ.” Ɛelǧiya n At Ziken, tettsuɣu “Ǧǧet-iyi abrid, anaɣ a Rebbi sɛiɣ buneggaf tkemmel-iyi rriḥ n lisans.” Ma d Tiziri, mm taɣect tarqaqt, yesla-as anagar Ugeswaḥ i yellan ar sdat-as: “Ur temɛineḍ ara a waɣzen, a win ur nettuṛebba” i tenna i win yellan deffir-s.
Seldmi mi yekker uɣebbar deg waluḍ di berra, lkar teččur, tawwurt tzemm. Arusuvur ɛerqent-as, amek ara d-yejmeɛ idrimen-is netta aqerruy-is ur yezmir ara ad t-iḥerrek!
Yiwen umɣar yettsuɣu-d ɣer deffir: “Ax ay aqcic, ṭṭef idrimen-ik.”Yiwen n bu ukustim yettsuɣu: “Acu-t uxessar-a, tettfuḥ lḥala da d tidi akked yisebbaḍen, ihuh, ur tezmirem ara ɛni ad tsucfem neɣ ad tbeddlem ttqacer?” akken ma llan, kkes-d ungif seg-sen, ɣef tikkelt: “Akka i d lkar, ma ur ak-yeɛjib ara lḥal llan yiṭaksiyen.”, Bu ukustim iqemmem, izemmem; yexza cciṭan, yessusem.
Iɛedda uzgen ssaɛa, arusuvur yessaweḍ yejmeɛ-d idrimen-is. Mi yuweḍ ar yiwet n temɣart ibedden sdat n yiwen n yilmeẓi yeqqimen, yendeh: “Deg leɛnaya-k ay argaz lɛali, eǧǧ-as amkan i temɣart-a, kečč tzemreḍ ad tbeddeḍ!”, ilemẓi ulin-a-d wurfan: “Amek, amek? Tamezwarut, d acu i tt-id-yuwin ssbeḥ-a? Tis snat, zgelli, ẓriɣ-tt tdemmir deg lɣaci, tura teqqel ur tezmir ara ad tbedd! Taneggarut, akken i txelles i xellseɣ… xersum ad qqimeɣ…. ad ak-d-rnuɣ tayeḍ: nekk mačči d argaz lɛali!” Tamɣart terfa, tebda ddɛawi: “Ruḥ awer tekkreḍ ay udem n yibki, a yir ccetla, a win ur nettuṛebba, a lǧil n ttaxir zzaman… ihih di zzman ideg d-neggra, yeqqel uqelmun s iḍarren… ih, akka i d lǧil… ruḥ awer tafeḍ ass amellal…”
Arusuvur ɛerqent-as: “Aẓ akkin… yaw, anef i yelli-s n medden… kečči dinna, sexsi ddexxan-ik… i kečči, ur ṭeyyir ara ccemma di lqaɛa… tesɛiḍ l’arret deg At Waɣi…”
Ungif yettnezzih kan… yewhem deg wayen ẓerrent wallen-is, rnu atan am uɛeqqa n yired gar yiɣuraf n tessirt, ulac s anda ara yerwel.
Akken i teṭṭer tmeṭṭut tamezwarut, mmi-s bu uleḥnak, i teṭṭef deg ufus-is, yerra-d akk ayefki i yeswa ṣṣbeḥ, yemma-s: “Alaṭif deg ṣṣbuḥ yecban wa, d tiṭ a mmi d tiṭ…”
Bu ukustim-nni yeqqel-d: “I tura, da ara neqqim ah, ḥerrek aql-aɣ nɛeṭṭel ɣef uxeddim.” Wid yellan dinna, akken ma llan, kkes-d ungif seg-sen, suɣen ɣef tikkelt: “Akka i d lkar, ma ur ak-yeɛjib ara lḥal, llan yiṭaksiyen.”
Mi tɛedda saɛa d uzgen, lkar tedda azal n ɛecra ikilumitren, dayen… d terminus.
Ungif yeṭṭer d aneggaru. Yemlelli. Yerra ɣer lqehwa. Yeddem-d taqerɛet n waman. Mi yekker ad ixelles, yufa ulac idrimen… yettwaker!
N. Mouaissi,
Seg tezlit n Atman Trisiti “truspur”
