Yal aḍris yesɛa amaru aya dayen ibanen. Yal amaru daɣen s uswir-ines. Yal amaru yesɛa iswan d yisuɣad uɣur yebɣa ad yaweḍ.Gar yiferdisen i d-isebganen aswir n umaru ad naf sin-agi n yiferdisen: Asentel akked uɣanib. Rnu d sin n yiferdisen-agi i as-yettakken azal aseklan i uḍris. Ma nga taselḍt d tanuyt s sin-agi n yiferdisen i yiḍrisen d yidlisen n tsekla i d-itteffɣen s tutlayt tamaziɣt, ad aɣ-d-banen sin n wanawen n yimura:
Imura alaḥsab n yisental akked tikta:
Wigi d imura iseftayen deg yisental i d-sekcamen deg yiḍrisen-nsen n tsekla. Lan yimura yeṭfen deg temsal d tlufa n tmetti tamensayt. Ttafen iman-nsen deg usenfali ɣef wayen iɛeddan, deg tuget isental-nsen dayen akken yellan neɣ i tqebbel tmetti n zman ideg yedder umaru.
Tarbaɛt-nniḍen n yimura, nutni ttqazamen isental. Ttecqqiriwen timetti d ttexmam n yimdanen. Ttenjaɛen allaɣ ad imiyez, ad iɛawed leḥsab. Dagi amaru yezmer ad yaweḍ ɣer yiswi-s, ad isɛeddi tasnakta-ines. Ad yekki deg ubeddel n ttexmam n kra n yimdanen. Meɛna yezmer ad d-yaf agraw neɣ timetti s lekmal-is mgal tikta d yisental i d-isedda deg uḍris-ines. Ad yaf ixṣimen ara yagin tasnakta-ines.
Taggayt-agi tis snat, bɣan ad d-suffɣen tasekla seg yirebbi aziki ad tt-id-awin ɣer talit tamirant. anecta s usidef n tikta timaynutin akked yisental imaynuten, ad seddun tasekla-nneɣ deg lǧerra n tsekla tagreɣlant.
Imura alaḥsab n uɣanib:
Seg tama-agi n uɣanib ad naf snat n taggayin n yimura. Imura iseftayen deg usenfali s usemres n tenfaliyin akked tugniwin n uɣanib. Tteffɣen seg umeslay n yal ass, ttcebbiḥen inaw s usexdem n tesnukyest, tteḥraṣen-iman-nsen ad d-arun s tenfaliyin n uɣanib yettakken ccbaḥa i tutlayt.
Asexdem n tunuɣin d tenfaliyin n uɣanib daɣen yemgarad seg umaru ɣer wayeḍ : lan yimura isexdamen gar cwiṭ d waṭas tasnukyest. Lan wiyaḍ semrasen s waṭas alama yuɣal uḍris-nsen n tesrit yettcabi tamedyazt ; d aɣanib-agi i wumi semman aɣanib udyiz.
Ma d taggayt tis snat ; wigi d imura ur nettnadi ara ad cebḥen aɣanib n uḍris-nsen. ur ttakken ara laɛtab i yiman-nsen akken ad arun inaw-nsen s tutlayt yimgaraden ɣef tutlayt yettmeslay ugdud. Imura-agi ur d-selqaḍen ara imeɣri ɣer yirebbi n uḍris s ucebbeḥ n tutlayt meɛna deg tuget ad ten-naf d imura iseftayen deg yisental akked tikta.
Sin-agi n yiferdisen (Asentel akked uɣanib) ur d-sebganayen ara kan taggayt uɣur ittekki umaru, isebgan-d ula d taggayt n yimeɣriyen. Imi yal imeɣri yesɛa lbenna taseklant yettnadi deg yiḍrisen.
Belɛidi Lyas.
