Arraz amaynut, arraz-nniḍen, arraz n Berbère TV… Arraz-a, tikkelt-a, yeslal-d deg-i lebɣi n tira… n wungal axaṭer iɛeggalen n Tesqamut-is fazen, ẓewren, d tasekla i tafellaḥt-nsen. Ad fken nnuba i « yiḍrisen » iwakken ad d-ifriren s ccbaḥa-nsen taseklant, s yisental, s usnulfu akked yiwellihen n umaru. Ad kkreɣ ihi ad cemmreɣ i yiɣallen-iw ɣa sakka d asemmiḍ, ad qableɣ isebtar imellalen iwakken ad ten-cebbḥeɣ s yisekkileni berkanen.
Tikkelt-a mačči « D tikti kan ! », ahat ilaq ad d-iniɣ « D rray kan ! » ara d-fkeɣ ɣef talɣut n Berbère TV yerzan Arraz i wungal akked uneggal i d-tsers s annar n tsekla s tagi-nneɣ, s yisekkilen ilatiniyen daɣen.
Tefren-d setta n yimussnawen ara yesɣerblen iḍrisen n yiwet n tewsit s yiwet n tutlayt. D isdawanen yessnen taqbaylit, kkren-d yis-s, lemden-tt, slemden-tt, uran yis-s… imir-a ad selḍen, ad ktazlen ayen uran yineggalen. Ɣas ma yella d rray-nsen kan ara d-fken, d aktazal-nsen kan ara xedmen, wicqa !… ad fernen win yeklalen ; win i d-yufraren deg tira, deg uɣanib, deg tutlayt… deg usnulfu, deg talɣa daɣen. Arraz-a daɣen d tadrimt i usebɣes n umaru, d afud i wiyaḍ. D ayen igerrzen maḍi.
Berbère TV d « tasudut » izemren i waya, iban-d deg wazal i tefka i Tesqamut n uktazal i d-thegga i Warraz-a. Ahatad tkemmel abrid suzuzzren n uneqqis ɣef yimeɣriyen ! Ahat ad d-theggi tasgilt i uskasi ɣef wayen yerzan ungal akked yiferdisen-is… wissen ahat ad nfaṛes tagnit, ad d-nagem kra n tmussni akked tarmit sɣur yiɛeggalen n Tesqamut.
Nekk ferḥeɣ aṭas s warraz-a n Berbère TV ɣas ur uriɣ ara ungalen. Ferḥeɣ aṭas s yimussnawen i yellan deg Tesqamut-is. D tarmit iwulmen, inefɛen imura akked yimeɣriyen axaṭer iban-d uswir-is d aɛlayan ; d aswir i as-fkan yisdawanen ara yektazlen iḍrisen seg-sen d imḍebbren n « Tangalt ». Ahat ad ilin kra mačči am nekk, ur t-bɣin ara Warraz-a ɣas akka ur yelli kra ara d-inin deg yiɛeggalen n Tesqamut ; ad ten-qableɣ kan swayen i d-yenna Rachid Tighilt : « A win ur nezgir asif, ur kkat deg win i yewwi ! » Tḥuzaḍa Rachid a gma, wid ur nessin akked wid yessexrabe nzgan kkaten deg wid i ten-yifen !
Tikkelt-a ihi d rray kan ! D asensef s warraz amaynut, d asnemmer i Berbère TV i yesdukklen imussnawen-a ntutlayt-nneɣ deg yiwet n Tesqamut i uktazal n yiwet seg tewsatin n tsekla-nneɣ, s tutlayt-nneɣ : ungal. Ssarameɣ d timlilit ara idumen.
« A win yeddan akked win i t-yifen, ad t-yettɛanad ad t-yaweḍ ! »
TANEMMIRT SEG WUL i Takfarinas Nait Chabane, Mohand Akli Salhi, Allaoua Rabehi, HaceneHalouane, Ramdane Achour akked Tahar Ould Amar.
Afud igerrzen, ssarameɣ ad yiɣzif umecwar n Warraz-a,ur yettili ara kan d anagi i umezruy !
Ramdane Abdenbi
Amaru
