Tira d iṭij deg tegrest, d inig deg taddart, d tudert n tmettant, d awal d aman; tettweccim ismektiyen akin deffir leqrun n timawit ideg ddren ttidiren wid yessnen annar n tsekla-nneγ. U dγa tameddurt n tudert : Dder: être en vie, vivant; idir, εic, ili: vivre, exister – yimawlan n yimawlan n yimawlan-nneγ. Tira d aman n tudert, d iziγer n tmedyezt, d tignawt n tsekla; d timussniwin n tussna, d amezruy n tfelseft, d tafelseft n talsa tazemnit.
Ayγer nettaru, acuγer i nettaru?
Nettaru iwakken ur nettmettat ara, iwakken ad nessufeγ tiselbi deg yirawnen-nneγ. Nettaru iwakken ad necfu; nettaru iwakken ad nili…nettaru skud nedder nettidir. Nebγa ad naru amezruy n umaḍal-a yeffγen i leεqel-is s tutlayt-a-nneγ, nra ad naru tameddurt n jellu n talsa-ya-nneγ tameγbunt tameṛkantit yeṛwan amdemmer d tarwa-s s tlalit nniḍen. Tira d tameslayt: D tameslayt n wid msakit ur nezmir ad d-yinin ayen i ten-iceγben s tira asmi llan d igelillen d igelliden, asmi llan d iẓawaliyen n wawal yefkan tayet i yal amdan yemmuγebnen, i yeddmen s wawal tamacahut n tudert-nneγ, yerran awellih γer wul n tmeddurt n ddunit-a: Awal d akal-iw, akal d awal-iw…awi-d kan ad nemyussan!
Moh Laid Deflaoui
