Mačči d tikkelt neγ snat i yettnaγ uneggal d yiwudam-is: snulfan-t-id mi ten-id-yesnulfa. Uγen abrid-nsen, leḥḥun lwaḥid γas akken ttemyuzzamen. Acḥal d abrid i mmserfan yiwudam gar-asen war ma ẓran win i ten-d-yeslulen, amaru-nsen, yemmut. U dγa, yenna-yasent-id yakan asmi zdin inezgumen-nsen: ″ I wid yemmuten mmuten d wid yemmuten ddren, tenwam d tidet mmuten?″ D wa i d awal alsan aseklan; ulac tameẓla (difference) gar yimdanen akken yebγu yili uẓayer-nsen (statut) di ddunit-a tameṛkantit tameγbunt. Ah lemmer amaḍal-a-nneγ d aseklan d amedyazan!
Akken i nteddu nekkni s timmad-nneγ d yiwudam n tmucuha n tudert-nneγ i teddun yiwudam – yettemyuzzamen, yettemsefqaεen, yeddakalen – deg wungal n bab n yimru, n bab n uxemmem. Aql-aγ akk d iwudam di ddunit-a. Tamacahut γezzifet lqayet; d amezruy n talsa, d amezruy n umaḍal, d amezruy n ugama n umezruy. Akin i wudmawen n uγanib (figures de style), ″tidmasent:allégorie″, ″tagergalt: allitération″ neγ ″ amegnamek: oxymore″ : Tira d lewhi n lebγi.
La d aγ-d-ssawalen, nettarra-yasen, acku nezga yid-sen d inmawalen (anmawal : parolier) neγ d inemyura (anemyaru: correspondant) γef leqdicat-nsen idelsanen. Yewwi-d ad nili yid-sen skud cennun ttarun s teqbaylit; d aktayen n tmettant i d tudert n ugama-ya-nneγ. Ula d imneṭri (le bohémien) d amedyaz ur nessin tamedyezt-is, yettmeslay mačči d kra, yessakay-d ibeḥriyen-is. Ad as-nṛuḥ kan s ttawil i ddunit-a skud nettaru s tutlayt-nneγ, nettaru s usekkil n tsekla-nneγ…
Moh Laid Deflaoui
