Timidṛanin (concepts) tifelsafiyin d axemmem, tutlayin d lemri n tira; ula d tamaziγt tettwaru seld axemmem-is imaw (oral) aqbur amezrayan. Akken i t-ssawaleγ dγa s wudem aseklan: Ur yezmir wemdan ad yili d win-nniḍen ma tekkseḍ-as tameddurt-is; yal wa, lḥaṣun, amek yettwali iman-is di tegnawt yessutur yigenni-s. Tidet tettwaqqen s yiseqqan n uciweṛ d usteqsi, s yimurar n uwelleh d nniyya. Ur yezmir ad yili wul d allaγ ma yeğğa yettu iεeggalen n tfekka-s; yal ales yettḥuffu tili-s, yettḥulfu s tili-s meskud iṭij-is yecreq.
Ur yelli wayen ur nezmir ad d-nini s teqbaylit skud yezdeγ lebγi-nneγ adelsan annar-nneγ aγerman (civilisationnel): Ulac nnig n tidmi (pensée) yessawalen tameddurt n yiẓawaliyen, n yiseflan udrigen. Ah lemmer nessen wid ur nettwassen! Ad naru ayen i γ-yehwan s tutlayt-nneγ mi dγa tesduri-yaγ tebγest tussnant (dévouement scientifique). Aṭaṣ i γ-teẓẓuγer tmawit:Tira d tudert n tulayt ay atmaten! Ayen nniḍen-nni d tameslayt kan…
Tabrat n tnekda[1]
Mass, Massa;
I tririt n ussumer n uxeddim akked udellel n tilizri-nwen « Tasekla TV » i d-terrim deg wadeg d wassaγ yellan nwen, ad awen-d-ceyyεeγ agzul-inu[2]iwakken ad qedceγ γur-wen d anemyaru[3]adelsan aseklan.
Гur-i aṭas n termitin[4] deg wayen yeεnan tira n teqbaylit; aṭas i yuriγ yakan γer yiwen n uγmis d aqbur yettwassnen ″Ameγbun″. Sufγeγ-d yakan deg useggas n 2014 ammud n yisefra, suqleγ-d ugar n yedṛisen seg tefransist γer teqbaylit i tdukkliwin-nneγ, zgiγ lliγ ar tura d anmawal (parolier) i kra n yicennayen-nneγ.
Aql-i ttaruγ, ttarraγ kan di rrif ayen iγef rriγ asirem ad d-yeffeγ: Ungal, ammud n yisefra d tmezgunt, ammud aseklan asegmisen (pédagogique) i warrac-nneγ akked Amxemmem: Essai γef umaḍal-a yemcewwalen, yettnadin anwa ara t-izedγen. Tin γur-s, γγareγ ttaruγ akka s tafat n yidmaren almi ssawḍeγad lemdeγ s wudem unṣib, s wudmawen alemdiman[5]ameγnasan. Seg zik i tezdeγ tira ul-iw, ladγa tira-ya-nneγ n tudert.
La ssarameγ timlilit yid-wen iwakken ad nemmeslay s telqey γef waya; u dγa, ad akun-snemmreγ γef uqbal n tenfaliyin-inu ifazen.
Imγi n tlelli
Tansa: 2628, azniq n tmagit, Tamurt.
[1] Tanekda, Tabṛat n tnekda: Présentation, lettre de présentation (de recommandation)
[2] Agzul: Résumé, CV.
[3] Anemyaru: Correspondant de presse…
[4] Tirmitin, Tarmit:Expérience(s)
[5] Alemdiman: Autodidacte
Moh Laid Deflaoui
