Akka! Ur zmireγ ad geγ tameẓla gar taddart d tutlayt. Ur ẓriγ ayγer? Neγ ahat, d ayen i izedγen seg zik aqerruy-iw. Ḥṣiγ nezzeh s waya. Zgiγ ttcawareγ tamedyezt-iw: d lḥir neγ d lxiq, d ameslay neγ d awal, d axemmem neγ d tidmi; d lebγi neγ d asirem, d tahregt neγ d tigzi, d tumert neγ d tayri, d tamussni neγ d tussna… d tiggujelt neγ d timuγbent. Yal ales ad yaf amur-is. U dγa, d acu-t umaḍal-a aṛehbani? I nessaram kan, akud d wadeg, ad ilin d tayuga ara yeddmen azaglu n ṣṣwab akken a γ-kerrzen tamzirt-a-nneγ…
Ur d targit i d tilawt n tigawt; wissen ahat d tigzi n tidmi yessufγen asefru akin i w ‶Awal‶.
Taddart… tutlayt:
Amek i la s-beddlen udem;
Taddart-a taddart-inu?
Ur tuklal yeffeγ-itt yisem
Tuγal amzun d abandu
Wi d-yerzan a tt-yessawem,
Iswi n lebγi-s ad tt-yazu
Wiss d acu-t yixf n tikli?
Sraffgen lbaz d iḥiqel:
D akal-nsen d igenni,
Di sin d igṭaṭ n usdukkel
Yerγa wul n ugama-nni;
A yillel γiwel siwel…
D acu-t ṣṣwab n tugdi?
Tabγest rkan yiγsan-is
Yeqqur wul yedkem yimi
D adur wissen ahat d idis
Nnig yiles yezdeγ yinγi
Aglim, tafekka-s d iγes-is
Taddart-iw tif tamurt-iw;
Mmyuttant…ziγ dduklent
Iziγer, lxaṭer-is d iles-iw
Giγ-asen axxam di tezγent
Ttekleγ awal d agrawliw
Yernan i tidet tisent
Tafekka teğğa tezmert
Adif-is γer watmaten
Adeg akud d timyigert
Di tussna ttemwanasen
Tamettant yeffγen tudert
Ad d-tlal akken nniḍen…
Moh Laid Deflaoui
