Anwa i yeggulen, anwa i iḥenten ? Win yettcebbiḥen tidet akken ad tt-walin, d aḥnat i tt-yesseḥnat. Win tt-iberden akken ad tεeddi di yal tiṭ, d aḥnat i tt-yesseḥnat.
Tidet, tḥemmel kan iles i tt-yeqqaren… ara tt-yinin akken d taḥerfit, war aεḍaf, war aseɣzef. Ur as-ilaq ufus ara tt-yessewḍen ; ur teḥwaǧ arquqen iberɛen. Tidet, annect senninet i zuret ; akken i tettεedday di tifli n tsegnit, akken ur tḥemmel tindar. Tidet, am tiqqit n waman, d tamsarit ; ma yeεna-tt ufus, ad tluɣ neɣ ad tekkaw.Tidet, akken tettεedday kan ɣer win i tt-yebɣan i tfessex deg yimi n win i tt-yesεeddayen akken yebɣa.
Win i yebɣan tidet akken tella, yettellez tullza n win i tt-yefran d yiman-is. Ma d win i tt-yebɣan akken kan i tt-yebɣa netta, ittellem tullma ur nferru.
Ma ur neẓri, yessefk ad nẓer : nnig tidet, d ulac ; ma rennun-as, tettenqas. Ddaw tidet, d ulac ; ma sneqsen-as, tettcufu. Acku tidet : d timenna-s i d tasarawt-is, timenna-s i d tamḍelt-is.
Muḥend Akli Salḥi
